شاهانه ائله بیل بیردن آییلدی . تلاشلا دئدی :
ــ آمان ، من هاردایام ؟ ایندی دایم منی آختاریر . منی جزالاندیراجاق!
ــ دایان چوخ قورخورسان ؟
ــ دایم دن یوخ . آتامین ساراییندا بیر عفریته قاری وار ان چوخ اوندان قورخورام . آتامین ایشی دارا دوشن کیمی ، چاغیریب اونا تاپیشسریق وئریر. قاری جادوسونو ایشه سالیب ، آتامین تاپیشیریغینی یئرینه یئتیریر. ایندی یقین کی، منیم ایتمه ییمی خبر وئریبلر . بو ساعات هارادا اولسا اؤزونو یئتیرجک . سنه ده خطر یئتیره بیلر . هر گون زهله می تؤکور . وزیرین چپ گؤز اوغلونو یانیمدا تعریف له ییر . منیم ایسه اوندان زهلم گيدیر .
قیزین سؤزلری احمدین خوشونا گلمدی . آز قالدی بو سؤزلردن سارسیلسین . اؤزونو توپلاییب دیللندی :
ــ بیر آزدا دایانا بیلمزسنمی؟
احمد بو سؤزلری قملی دئدی . قیزی بیر داها سوزوب دریندن آه چکدی شاهانه آیاغا قالخدی ، الینی هاوادا یئلله یرک : ــ الوداع ، ــ دئدی . سونرا دا دره آشاغی گئتمه یه باشلادی .
احمد چاشیب قالدی . نه ائده جه یینی بیلمه دی . او ، بو تئزلیکله شاهانه دن آیریلماق ایستمیر دی .
احمد :
ــ یاخشی . ایندی کی ، گئدیرسن قوی سنی اؤتوروم ، ــ دئدی .
ــ ایگید اوغلان ، اولماز . سنی منیم یانیمدا گؤررلر. بیزیم گؤروشوموزو کیمسه بیلممه لیدیر . اگر آتام ائشیتسه سنی موکافاتلاندیرماق عوضینه زندانا سالدیرار.
احمد دئدی :
ــ آتانین ظولموندن خبر دارام اونون ظولموندن قاچیب بو داغلاردا مسکن سالمیشیق . آنجاق بورادا دا راحلیق یوخدور .
ــ نییه راحاتلیق یوخدور؟
ــ اونا گؤره کی ، بو داغلار آرخاسیندا بیر دیو یاشاییر . ایلده ایکی دفعه هجوم ائدیب واریمیزی ـ یوخوموزو تالاییب آپاریر . هئچ کس اونونلا باجارا بیلمیر .
دیو آدینی ائشیدن کیمی قورخودان شاهانه نین توکلری بیز ـ بیز اولدو .
ــ آمان ، من قورخورام ! ایندی گلر . منی یولا سال .
ــ منیم یانیمدا هئچ ندن قورخما ، ــ دئیه احمد قیزا بیر قدر ده یاخین گلدی . آیریلیق واختی چاتمیشدی . شاهانه دیللندی :
ــ منیم خیلاص کاریم ، یاخینا گل .
احمدایره لی یئریدی . شاهانه اونون ساچلارینی اؤز ظریف اللری ایله تومارلایاراق دئدی :
ــ بیلمیرم سنه نه هدیه وئریم؟ آخی منی اؤلومدن قورتاردین ...
احمد دئدی :
ــ هئچ نه ایستمیرم . بومنیم انسانلیق بورجومدور .
قیز ساکیتجه بارماغینداکی اوزویو چیخاریب احمدین بارماغینا تاخماق ایسته دی . احمد الینی گئری چکرک راضیلیق وئرمدی .
قیز قوینوندان قیراغی زر حاشیه لی دستمالی چیخاریب احمدین آچیق یاخاسیندان ایچری سالدی .
احمد:
ــ آخی ، دستمال آیریلیق دیر ، ــ دئدی .
شاهانه گولومسه دی:
ــ اونو کیم دئییر ؟ یایلیق آیریلق دئییل...
احمد دسمالی قوینوندان چیخاریب الینده توتاراق دئدی :
ــ بو دسمالی عؤموروم بویو ساخلایاجاغام . بس منیم یادیگاریم نه اولسون ؟
شاهانه ، اطرافا گؤز گزدیردی . نظرلری سیلدیریم قایاداکی ، تنها ، ظریف آغ چیچه یه ساتاشدی .
ــ باخ ، او چیچه یی در منه وئر ، ــ دئدی . ــ اونو سولماغا قویمایاجاغام . سنین یادگارین کیمی ساخلایاجاغام ،
احمد جلد قایایا دیرمانیب چیچه یی اوزدو . اونو شاهانه یه وئردی . شاهانه آغ چیچه یی یوخاری قالدیراراق ، هاوادا یئلله ده ـ یئلله ده اوزاقلاشدی .احمد ده اونا دسمال یئلله دی . شاهانه گؤزدن ایتینجه یئرینده دونوب قالدی . سانکی ، شاهانه نین سئحریندن چیخا بیلمیردی .
احمدی خیالدان کوپ قاریسی نین دونقولتوسوآییردی . قاری دونقولدانا ـ دونقولدانا دئییردی :
ــ آها ، دئمک بئله . اودونچو احمدین اشتهاسی نا باخ! شاه قیزینا وورولوب . شاهانه دسمالینی اونا یادیگار ويردی . بونلارین هامیسینی شاها خبر وئرمک لازیمدیر . یاخشی احمد ، شاه قیزینی سئومه یی سنه گؤستره ره م ! سس کسیلدی . احمد کؤنولسوز حالدا بالتانی گؤتوروب قورو اودونلاردان کسدی . شاهانه دن آیریلاندان سونرا ائله بیل گوجدن دوشموشدو .گوج ـ بلا ایله شله سینی دالینا آلیب ائوه یوللاندی . کند یولونا یئنیجه چیخمیشدی کی ، قارشیسینا اوز ـ گؤزوندن زهرمار یاغان بیر قاری چیخدی . دونقولتوسو اوزاقدان ائشیدیلیردی :
ــ گؤروم آنان آغلار قالسین ! اوجاغین سؤنسون ! من سنه نئیله میشدیم !
احمد قاری یا یاناشدی :
ــ کیمی قارغیریسان، آی ننه ؟
ــ اود آپارمیش ، گوجله ییغدیغیم چیر ـ چیرپینی الیمدن آلیب قاچدی . گؤروم اونون آناسی آغلار قالسین . سن بویدا اوغلان ایدی
احمدین اوره یی یوموشالدی .
ــ ننه جان ، آغلاما . باخ بو شله نی سنه وئره رم . آپار اوجاغینی یاندیر .
قاری آج گؤزلوکله شله نی احمددن آلیب چینینه قالدیرماق ایسته دی . آنجاق شله ایری اولدوغوندان گوجوچاتمادی .
Post #30502
246