اوشاق ادبیاتی

چئویرن: منیژه جم‌نژاد

ایپک قوردو

آی ایشیغیندا، کیچیک بیر یومورتا بیر یارپاق اوستونده آرامجا یاتمیشدی.
آیی گؤرورسن؟ کیچیک یومورتانی دا گؤرورسن؟
بیر یکشنبه سحری، ایستی گونش دوغدو و... «پات!» یومورتادان بالاجا، چوخ آج بیر قورد چیخدی. او، یئیه‌جک بیر شی آختارماغا باشلادی.
دوشنبه گونو، بیر آلمانی دلیب یئیب کئچدی. آمّا هله‌ده آج ایدی.
سه‌شنبه گونو، ایکی آرمودو دلیب یئیب کئچدی. آمّا هله‌ده آج ایدی.
چارشنبه گونو، اوچ اریک دلیب یئیب کئچدی. آمّا هله‌ده آج ایدی.
پنجشنبه گونو، دؤرد چیلک دلیب یئیب کئچدی. آمّا هله‌ده آج ایدی.
جمعه گونو، بش پورتاغال دلیب یئیب کئچدی. آمّا هله‌ده آج ایدی.
شنبه گونو، بیر پارچا شوکولاتلی کیک، بیر بستنی، بیر خیارشور، بیر دیلیم سوییس پنیری، بیر دیلیم سوسیس، بیر مامپاس، بیر پارچا گیلاسلی پای، بیر پارچا کالباس، بیر فنجان کیک  و بیر دیلیم قارپیـز دلیب یئیب کئچدی.
او گئجه قارنی آغریدی!
صاباحیسی گون، یئنه یکشنبه گونو ایدی. قورد، یاشیل، تزه بیر یارپاغی دلیب یئدی. اوندان سونرا حالی چوخ یاخشیلاشدی.
آرتیق نه آج ایدی، نه ده بالاجا بیر قورد. او، بؤیوک، کؤک بیر قورد اولموشدو.
سونرا اؤزونه کیچیک بیر ائو تیكدی؛ بونا «قوزا» دئییرلر.
قورد ایکی هفته‌دن چوخ قوزانین ایچینده قالدی. سونرا قوزانین اوستونده کیچیک بیر دئشیک آچدی، اؤزونو ائشییه چکدی و...
او، چوخ گؤزل بیر کپه‌نک اولموشدو!
https://t.me/Adabiyyatsevanlar