یعقوب_نیکزاد

سن ده هر گون بو داغی من‌له دولاندین، یوخسا یوخ؟!
دیلده بیتمیش دوغما عشقی اؤزگه ساندین، یوخسا یوخ؟!

"کور اوجاقدان اود قاپیر آرزو" دئمیشدیم. باخمادین
بو دوشر، دوشمز حیاتدا سن‌ده یاندین، یوخسا یوخ؟!

بیر کرم قیل، کؤکسوموزدن اود قاییتسین اصلینه!
کول اولوب، سونسوز ناغیللاردا سیناندین، یوخسا یوخ؟!

هر گئجه یاتدیق، یوخو گؤردوک آزادلیق نغمه‌سین
یول چکن صبری قیزیرقاندین، قیناندین، یوخسا یوخ؟!

اؤز الیمده اولمادی وورغونلوغوم... گؤز قیرپیمی،
اللریمدن اوچدو سئوگی، سن ایناندین، یوخسا یوخ؟!

عؤمروموزدن آغ گونو کؤچدوردولر، قارقیشلاییب
ایلدیریم چاخدی، بولودلارلا تالاندین، یوخسا یوخ؟!

سونگه چیخدیقجا دونوب، دؤندوم داشا، سن گیزلیجه
گوزگولرده چوخ گولوش ساتدین، قازاندین، یوخسا یوخ؟!

بیر پارا پرده یاراتدیم، بوقچا_بوقچا گیزله‌دم...
یازدیغیم شعرین سؤزو چیخدی اوتاندین، یوخسا یوخ؟!

https://t.me/Adabiyyatsevanlar