ویداحشمتی ادبیات سئونلر
تبریزده «ائل ائوی» مؤسسه‌سینده «قوردلارلا قاچان قادینلار» کیتابینین تانیتیم و اینجه‌لمه توپلانتی‌سیندان گزارش
«قوردلارلا قاچان قادینلار» کیتابینین تانیتیم و اینجه‌لمه توپلانتی‌سی، تهران‌دان گلن قوناقلارین ایشتیراکی ایله، صمیمی و مدنی بیر اورتامدا، «قادین اثرلری کیتابخاناسی»نین قوروچوسو خانم فرانک فریدین اهتمامی ایله «ائل ائوی» مؤسسه‌سینده کئچیریلدی. برنامه خانم سلطانی‌نین «شهریاردان اینشتین‌ه پیام» شعیرینی اوخوماغی ایله باشلاندی و سونرا پروگرامین آردی خانم مهدیه آهنی‌نین آپاریجیلیغی ایله داوام ائتدی.
پروگرامین ایلک دانیشانی، «قوردلارلا قاچان قادینلار» کیتابینین مترجمی خانم سیمین موحد اولدو. او، کیتابین ترجمه سوره‌جی، فارسجا نسخه‌‌سینین نشر تاریخی و اوخوجولار طرفیندن گؤردویو بؤیوک ماراق باره‌ده دانیشدی. هابئله بیلدیردی کی، اثرین فارسجا ترجمه‌سی، اصلی نسخه‌نین نشریندن چوخ آز بیر مدت سونرا چاپ اولونوب و سونرادان بیر نسخه‌سی یازار، کلاریسا پینکولا استسه چاتدیریلیب. اؤز دئدیگینه گؤره، خانم استس فارسجا ترجمه‌نی و ایرانلی اوخوجولارین بو اثری بؤیوک استقباللا قارشیلادیغینی گؤردوگونده، چوخ سئوینیب و سئوینجدن رقص ائدیب. بو خاطره حاضر اولانلارین دا گولوش و ماراغی ایله قارشیلاندي.
خانم موحد، بئله بیر اثرین ترجمه‌سی‌نین چتینلیک‌لریندن سؤز آچدی؛ روان‌شناسی، اساطیر، فولکلور و ادبیاتین بیر-بیرینه قاریشلیغی بئله بیر کیتابین مفهوملارینی فارسی دیلینه، دوغرو و ظریف بیر شکلده کؤچورتمه‌نین راحات اولمادیغینی و بؤیوک دقت ایستدیگینی وورغولادی.
سونرا خانم دکتر رابعه موحدی، اساطیره، روان‌شناختی باخیشلا یاناشاراق، کؤهنه روایت‌لرین و نمادلارین انسان روحونون گیزلی قاتلارینی آنلاماقداکی رولوندان سؤز آچدی. او، روان‌شناسی و تحلیلی باخیشی ایله اساطیرین بوگونکو حیاتداکی یئرینی تحلیل ائتدی.
پروگرامین سونراکی دانیشانی خانم ویدا حشمتی اولدو. او، «تورک اساطیر و حماسه‌لرینده قادینین یئری» موضوعوسوندا دانیشاراق، تورک اساطیر، حماسه و فولکلوروندا یئر آلان قادین سیمالارینی تانیتدی. اومای‍آنا، آغ‌آنا، آسئنا، دده‌م قورقود داستانلاریندا یئر آلان قادینلار و آل‌آروادی کیمی شخصیت‌لره توخوناراق، تورکلرین اساطیری دوشونجه‌سینده قادینین یئری و اهمیتینی آچیقلاماغا چالیشدی. دانیشیغین سون بؤلومونده ایسه، «قوردلارلا قاچان قادینلار» کیتابیندان الهام آلاراق، بیزیم زنگین اساطیر و فولکلوروموزون دا گله‌جکده روان‌شناختی آراشدیرمالارا و یئنی اوخونوشلارا الهام وئره بیله‌جه‌ئی فیکری مطرح اولوندو.
قیسا بیر آرا و پذیرایی‌دان سونرا، خانم سیمین موحدین قاتیلدیغی سورغو-جواب بؤلومو باشلاندی. ایشتیراکچیلار ترجمه سوره‌جی، یازارین باخیشی، مختلف فرهنگ‌لرده اساطیرین یئری و بو اثرین ایرانلی اوخوجولارا تأثیری باره‌ده ماراقلی سؤاللار وئردیلر و مترجمین جاوابلاری صمیمی و ثمره‌لی بیر صحبت اورتایا چیخاردی.
پروگرام، شام یئدیکدن سونرا، صمیمی بیر اورتامدا سونا چاتدی. ادبیات، اساطیر، فولکلور و روان‌شناسی آلانلارینا ماراغی اولانلار اوچون یارارلی بیر گؤروش و فیکیر اولان بو توپلانتی، ایشتیراکچیلارین بؤیوک استقبالینی قازاندی.
https://t.me/Adabiyyatsevanlar
Post #30437
404