اوشاق ادبیاتی
۲
سئحیرلی اوزوک 
 ایکینجی ناغیل :
« احمدین یوخوسو »
یازان : علی صمدلی
کؤچورن : علی آغ گونئيلی  ــ  ابرازی 
کتاب :‌ ژنرالین اوشاقلیغی ) پووئست لر بؤلومو )

احمد یوخوسوندا گؤرورکی، گؤزه ل بیر یاز گونودور . کندیرینی و بالتاسینی گؤتوروب مئشه یه یوللانیر . یولو اوزاندیقجا اوزانیر ، لاله لی دوزلردن کئچیر . چه – چه ووران قوشلار احمدین باشینا ، چینینه قونوب شن – شن اوخویورلار. لاله لیک قورتاریر. احمد آغ چیچکلر دنیزینه دوشور . بوردا اونو زرناخیشلی کپنکلر سالاملاییر . زومورود یاماجلی تپه نی آشان کیمی گؤزلری اؤنونده باشقا عالم جانلانیر ، شاه قیزی قیرخ گؤزه ل قیزلا سئیره چیخیب. او، ظریف لیی ایله بوتون قیزلاردان سئچسلیر . قیزلار دوم آق ، شاه قیزی ایسه ال – الوان گئییم ده دیر . قیزلارین آیاقلاری یيره دیمیر . قو قوشلاری کیمی آستاجا قاناد چالیر یئره دیمیر ، قو قوشلاری کیمی آستاجا قاناد چالیر ، هاوادا سوزور ، شاه قیزینی ظریف اللری اوستونده آپاریرلار. احمد حئیرانلیقلابو منظره نی سئیر ائدیر، اؤزونو دونیانین ان بخته ور انسانی سانیردی . بیرده گؤردو کی ، قیزلارین دسته سی اونا چاتماقدادیر . بیر گؤز قیرپیمیندا قارشیداکی ایری پالید آغاجینا چیخدی . قیزلار لاپ یاخینلاشدیلار . احمد یارپاقلار آراسیندا گیزلندی .قیزلار پالید آغاجی نین آلتینا چاتاندا شاه قیزی اینجه سسله دئدی : 
ــ یورولدوم، دینجلمک ایسته ییرم ! 
قیزلار اونو اللری اوستوندن یئره ائندیردیلر . یئلپازلری ایله اونو یئلله دیلر . شاه قیزی یاواشدان الینی الینه ووردو .سن دئمه ، بو ، رقصه ایشاره ایمیش . قیرخ قیزین رقصی باشلاندی . قیزلارین آیاقلاری سانکی یئره توخونموردو . رقص بیتن کیمی گؤی گورولدادی . ایلدیریم چاخدی . لئیسان باشلادی . قیزلار بیر گؤز قیرپیمیندا یوخ اولدولار . احمد اؤزونو یاغیشدان قوروماق اوچون بیر قدر آشاغی ائنیب قوجا پالیدین کوغوشونا گیردی .
ــ  دور، باشینا دؤنوم، گون- گون اورتا اولدو . اودونون واختی کئچیر . ایستی یه دوشجک سن ، ــ دئیه  ننه سی اونو یوخودان اویاتدی .احمد گؤزلرینی اوووشدوروب آیاغا قالخدی . ال- اوزونو یودو. شور- چؤره ک باغلاماسینی و بالتاسینی گؤتوروب یولا دوزلدی بو خوش یوخوسونو ایسه اوزون موددت اونودا بیلمه دی .
https://t.me/Adabiyyatsevanlar