🔯 Azərbaycanda ilk İsrail silah zavodunda istehsala başlanılıb

Bu, ölkədə Qərb standartlarına uyğun M-4 tipli tüfənglər istehsal edən ilk müəssisədir.

İsrailin ARI Arms silah şirkəti Azərbaycanda silah istehsalına başlayıb. Şirkətin yaydığı press-relizə əsasən, oktyabrın əvvəlində keçirilən açılış mərasimində Prezident İlham Əliyev də iştirak edib. Zavod Bakıya məxsusdur və İsrail ilə Azərbaycanın müdafiə nazirlikləri arasında yaradılmış birgə müəssisənin tərkib hissəsidir. Bu, ölkədə Qərb standartlarına uyğun M-4 tipli tüfənglər istehsal edən ilk müəssisədir.

Zavodun açılışı İsrailin Qəzzadakı hərəkətlərinin beynəlxalq səviyyədə qınanmasına baxmayaraq, Azərbaycanın bu ölkə ilə müdafiə və enerji sahələrində əlaqələrini dərinləşdirməyə davam etdiyi bir dövrə təsadüf edir.

2025-ci ilin iyununda Azərbaycanın dövlət enerji şirkəti SOCAR İsrailin ən böyük qaz yataqlarından biri olan “Tamar” layihəsində təxminən 1,25 milyard dollar dəyərində sövdələşmə çərçivəsində 10 faizlik pay alıb

2024-cü ildə isə ARI Arms şirkətinin törəmə müəssisəsi olduğu AS Holidays ilk dəfə Azərbaycanın Müdafiə Nazirliyi ilə əlaqəli şirkətlə anlaşma memorandumu imzalayıb.

Bununla belə, Azərbaycan əməkdaşlığın miqyası ilə bağlı bəzi iddiaları təkzib edib. Avqust ayında Bakı İran müharibəsi zamanı İsrail hərbçilərinin Azərbaycan ərazisindən fəaliyyət göstərdiyinə dair reportaja görə CNN telekanalına qarşı məhkəmə iddiası qaldırdığını açıqlayıb.

ARI Arms şirkəti LinkedIn platformasında paylaşdığı məlumatda zavodun açılışını təsdiqləyərək bildirib:

“Azərbaycanın Müdafiə Sənayesi Nazirliyi ilə birgə müəssisə çərçivəsində ARI Arms şirkətinin Azərbaycanda AR-15 platformalı tüfənglərin (OR-4) yerli istehsalına başladığını qürurla bildiririk. Bu, ölkədə Qərb standartlarına uyğun tüfənglərin ilk istehsalıdır”.

İsrail şirkəti həmçinin qeyd edib:

“ARI Arms Qərb istehsal standartlarını yerli səviyyədə tətbiq etmək üçün texnologiya və texniki biliklər təqdim edir. Bizim fəaliyyətimiz yalnız hazır silah sistemlərinin tədarükü ilə məhdudlaşmır. Biz hökumətlərlə tərəfdaşlıq edərək yerli istehsal imkanlarının yaradılmasına və uzunmüddətli sənaye müstəqilliyinin təmin olunmasına kömək edirik”.

ARI Arms daha əvvəl Filippin və Ermənistanla əməkdaşlıq edib, 2025-ci ildə isə İsrail Müdafiə Qüvvələrinin (SAXAL) keçirdiyi tenderin qalibi olub.

ARI Arms bu müqaviləni 2024-cü ilin sonunda başqa bir sifariş üzrə qalib elan edildikdən və həmin sifariş qısa müddət sonra ləğv olunduqdan az sonra imzalayıb. İsrailin Müdafiə Nazirliyi əvvəlki sifarişin ləğvini “tender prosesindəki nöqsanlarla” əsaslandırıb. ARI Arms isə bu iddia ilə razılaşmayıb.

Müqaviləni əldə etməzdən əvvəl Haaretz qəzetinin apardığı araşdırma nəticəsində məlum olub ki, əvvəllər əsasən metal və plastik emalı üzrə ixtisaslaşmış şirkətin silah istehsalı sahəsində təcrübəsi az olub.

Mənbə: OC Media

✡️ Abunə olun