دوکتور « حسین صدیق» ( دوزگون) ۴ ایلدیر آرامیزدا یوخدور...!

جمعه گونو ٣٠ مرداد ١۴٠۵ تانینمیش ادیب و یازار رحمتلیک دوکتور صدیق (دوزگون) وفاتی نین دؤردونجو ایل دؤنومو ایدی .
البته وفاتی‌نین دقیق تاریخی شهریور آیی‌نین ایکیسی ایدی، آمما بو تاریخ ، هفته آراسینا دوشدویونه گؤره اونون وفاتی‌نین ایل دؤنومو مراسیمینی آتاسینین ادبی میراثینی قوروماقدا یورولمادان چالیشان اوغلو « ائلدار صدیق» باشدا اولماقلا عائله‌سی، جمعه گونو ٣٠ مرداد ١۴٠۵ و یاشادیغی ائوه سالمیشدی.
مراسیم ، رحمتلیک دوکتور صدیقین دوستلاری، شاعیر، یازیچی و ادبیاتچیلار طرفیندن و خصوصی محفیل و مجلیس اولاراق آخشام اوستو ساعات ۵- دن ٨ قدر داوام ائده رک دوکتور صدیقین بِؤیوک کیتابخاناسیندان گؤروش ائدندن سونرا سونا چاتدی.
بو خصوصی مراسیمده مجلسین قوجامان و تجروبه‌لی ادیب و شاعیری « حسن مجیدزاده ( ساوالان) دان علاوه اوزون ایللر دیلیمیز و ادبیاتیمیز یولوندا یورولمادان چالیشان حسین ولیجانی، اکبر آزاد، حسن راشدی ، فیروز رفاهی، مرتضی مجدفر، قیزیل قلم، زاهد،اصلانی، صدیار، فاتحی،احمدی، سلیم اوغلو، لطفی ، ساچلی خانیم و،ائلیمیز و اوبامیزین ساز صنعتینده آد سان صاحیبی «عاشیق محبوب خلیلی» ، دوستو ساسان قویدل و دوکتور صدیقین اؤیرنجیلریندن اوجمله‌دن گنج شاعیر ابوالفضل محمدزاده ، امیر عباس قهرمانی ،لطفی ، برقی و ... شرکت ائتمیشدیلر.
بو مراسیمین آپاریجیسی صابر انجمنی‌ عضوو و ملّی - مدنی فعال اکبر صالحی ایدی .
مراسیمده شرکت ائدنلرین هر بیری رحمتلیک دوکتور صدیق حاقدا خاطره‌لریندن و دویغولاریندان دانیشدیلار، هامی دان آرتیق و ١۶- ١٧ یاشیندان سون ایللره قدر اؤزونو دوکتور صدیقین شاگیردی سایان «دوکتور مجدفر»ین اؤزل خاطره‌سی هرکسین نظرینی چکدی!

#دوکتور_حسین_صدیق



https://telegram.me/yurddash

https://www.instagram.com/hasan_rashidi_zahra

http://yurddash.arzublog.com/