Эмомалӣ Раҳмон омодагии ҳамаҷониба ба зимистони 2026–2027-ро талаб кард

30 сентябр таҳти раёсати Президенти Тоҷикистон Эмомалӣ Раҳмон маҷлиси Ҳукумати кишвар баргузор шуд.

Дар оғози ҷаласа президент ба аъзои Ҳукумат ва роҳбарони сохторҳои дахлдор зарурати иҷрои ҳатмӣ ва саривақтии супоришҳои қаблан додашударо таъкид кард.

Яке аз масъалаҳои асосӣ омодагӣ ба зимистони солҳои 2026–2027 буд. Ба масъулин супориш дода шуд, ки барои мавсими сармо корҳои омодагиро ҳамаҷониба ба роҳ монда, захираи кофии маводи сӯхт ва маҳсулоти ғизоӣ таъмин карда шавад.

Ҳамзамон, Эмомалӣ Раҳмон барои ҷамъоварии ҳосили боқимондаи пахта, меваю сабзавот, гузаронидани кишти тирамоҳии ғалла ва идомаву густариши корҳои ободонию созандагӣ вазифаҳои мушаххас гузошт.

Президент таъкид кард, ки масъулон бояд иҷрои супоришҳои гузошташударо сари вақт таъмин намуда, ба масъалаҳои мубрам ва рӯзмарраи кишвар таваҷҷуҳи ҷиддӣ зоҳир намоянд.

📲 Your.tj дар ➡️ Telegram / Facebook / Instagram / TikTok / Threads