Javohir Sindarov dunyo reytingida kuchli uchlikka kirdi

O‘zbekistonlik grossmeyster Javohir Sindarov klassik shaxmat bo‘yicha faoliyatidagi eng yuqori natijalardan birini qayd etdi.

20 yoshli shaxmatchi FIDEning joriy natijalar asosida shakllanadigan live-reytingida uchinchi pog‘onaga ko‘tarilib, ilk bor dunyoning eng kuchli uch grossmeysteri qatoridan joy oldi.

Sindarov — 2782 reyting ochkosi bilan uchinchi

Reytingdagi o‘zgarishga AQSH shaxmat chempionatidagi natijalardan biri ham ta’sir ko‘rsatdi. Fabiano Karuananing Endi Vudvordga qarshi partiyada mag‘lubiyatga uchrashi Sindarovning yuqorilashiga imkon yaratdi.

O‘zbekiston vakili ayni paytda 2782 reyting ochkosiga ega.

Undan yuqorida faqat norvegiyalik Magnus Karlsen va amerikalik Hikaru Nakamura joylashgan. Karlsen 2823, Nakamura esa 2792 ochko bilan yetakchilar qatorida bormoqda.

Kuchli beshlikda ikki o‘zbekistonlik

Jahon reytingining yuqori pog‘onalarida O‘zbekistonning yana bir vakili — Nodirbek Abdusattorov ham bor.

U 2780 reyting ochkosi bilan beshinchi o‘rinni egallab turibdi.

Shu tariqa, klassik shaxmat bo‘yicha dunyoning kuchli besh grossmeysteri orasida bir vaqtning o‘zida ikki nafar o‘zbekistonlik joy oldi.

Samarqanddagi muvaffaqiyatdan keyingi yangi natija

O‘zbekiston shaxmatchilari yaqinda Samarqandda o‘tkazilgan 46-Butunjahon shaxmat Olimpiadasida ham yuqori natijalarni qayd etgan edi.

Erkaklar terma jamoasi musobaqani oltin medal bilan yakunlab, 2022 yilgi chempionlik natijasini takrorladi.

Javohir Sindarov Olimpiadada 10 ta partiyada qatnashib, 7 ochko jamg‘ardi va ikkinchi taxtada bronza medaliga sazovor bo‘ldi.

Nodirbek Abdusattorov esa birinchi taxtada eng yaxshi ko‘rsatkichni qayd etib, shaxsiy oltin medalni qo‘lga kiritdi.

🏦O‘zbek va jahon sportiga oid eng so‘nggi yangiliklar: @Uzasport