Ilya Sibirsev Jahon kubogida bronza medalini qo‘lga kiritib, O‘zbekiston rekordini yangiladi

O‘zbekiston suzish terma jamoasi a’zosi Ilya Sibirsev Qozog‘iston poytaxti Ostona shahrida boshlangan Jahon kubogining uchinchi bosqichida sovrindorlar qatoridan joy oldi.

25 metrli basseynda o‘tkazilayotgan musobaqada hamyurtimiz 1500 metrga erkin usulda suzish bahsida uchinchi natijani qayd etdi.

Bronza bilan birga yangi rekord

Sibirsev masofani 14 daqiqa 43,97 soniyada bosib o‘tib, bronza medaliga sazovor bo‘ldi.

Mazkur natija sportchiga nafaqat Jahon kubogi sovrinini, balki 25 metrli basseynda 1500 metrga erkin usulda suzish bo‘yicha O‘zbekistonning yangi rekordini ham taqdim etdi.

Bellashuvda belgiyalik Lukas Henve 14:33.14 natija bilan g‘olib chiqdi.

Vengriya vakili Oliver Papai esa 14:40.55 ko‘rsatkich bilan ikkinchi o‘rinni egalladi.

1500 metr, erkin usul:
Lukas Henve (Belgiya) — 14:33.14
Oliver Papai (Vengriya) — 14:40.55
Ilya Sibirsev (O‘zbekiston) — 14:43.97

🏦O‘zbek va jahon sportiga oid eng so‘nggi yangiliklar: @Uzasport