Астанада Telegram арқылы есірткі сатқан ұйымдасқан қылмыстық топ сотталды

Көліктегі полиция департаментінің қызметкерлері Бас көлік прокуратурасының үйлестіруімен Астана қаласы мен өзге де өңірлерде "Pitbullshop" Telegram-дүкені арқылы есірткі заттарын сатумен айналысқан ұйымдасқан қылмыстық топтың әрекетін әшкереледі. Арнайы операция барысында 25 пен 40 жас аралығындағы бес күдікті ұсталды.

Мүшелері арасында міндеттері нақты бөлінген бұл топтың қылмыстық әрекеті кезінде екі мыңға жуық жасырын орын ұйымдастырылып, заңсыз сауда айналымы 90 миллион теңгеден асқан.

Тінту және жедел іс-шаралар барысында полицейлер 165 грамнан астам марихуана мен каннабис шайырын, сондай-ақ қаптама материалдарын, электронды таразыларды, банк карталары мен қаржылай заттарды тәркіледі. Сот шешімімен бес айыпталушы да кінәлі деп танылып, топ ұйымдастырушысы 17 жылға, ал қалған төрт қатысушысы 16 жылға бас бостандығынан айырылды.