bakiroo

​Энергорегулятор табиий ва суюлтирилган газ бозорини ҳам тартибга солади

Энергетика бозорини ривожлантириш ва тартибга солиш агентлиги, яъни энергорегулятор зиммасига электр энергияси билан бир қаторда табиий ва суюлтирилган газ таъминотида бозор тамойилларини босқичма-босқич шакллантириш ҳамда тартибга солиш вазифалари юклатилади.

Ўзи аввалбошдан шундай рационал режалар бўлган, лекин 2 йил аввал ёқилғи энергетикаси секторида бозор томон ҳаракатлар тўхтаб, ортга қайтиш юз берганди.

Яна бир муҳим қадам — ёпиқ ва индивидуал рухсатномалар бериш амалиётининг тўхтатилаётгани билан боғлиқ. Энг коррупцион, ношаффоф ва якуний юки бечора истеъмолчилар бўйнига тушадиган бу амалиёт охирги йилларда камайиш ўрнига, фақат кўпайиб бораётганди.

Демак, энди Энергетика вазирлиги томонидан ёқилғи-энергетика тармоғи корхоналари ва истеъмолчиларига шартномавий, хизмат кўрсатиш ва бошқа хўжалик муносабатлари бўйича индивидуал тусдаги рухсатномалар бериш амалиёти бекор қилинади.

Сирдарёдаги ИЭС авариявий ўчган

Энергетика вазирлиги баён қилишича, бугун соат 05:05 да Сирдарё вилоятида жойлашган EDF компаниясига тегишли янги иссиқлик электр станциясида 1600 МВт қувват авариявий ўчган.

Мазкур станция янги қурилгани, айни вақтда унда синов-созлаш ишлари олиб борилаётгани айтилган.

Станциянинг авариявий ўчиши натижасида аварияга қарши автоматика ишлаб, республиканинг айрим қисмларида электр таъминоти вақтинча узилган. Асосан қишлоқ хўжалиги сув насослари ва аҳоли истеъмолчиларининг электр таъминотида узилишлар кузатилган.

Электр таъминотини тиклаш жараёнида энергия сақлаш тизимларидаги ҳамда электр станцияларидаги захира қувватлар ишга туширилиб, истеъмолчилар босқичма-босқич тармоққа улангани таъкидланган.

​Ўзбекистон ўрта синф мамлакати, Тошкент юқори ўрта синф шаҳрига айланмоқда

Камбағалликни қисқартириш сиёсати натижалари фаровонлик қатламлари таркибининг ўзгариши призмаси орқали ҳам кузатилган.

Демак, 2021 йилдан 2025 йилгача Ўзбекистонда ўрта синф улуши 37%дан 72%гача кўтарилган. Бунда юқори ўрта синф улуши 8%дан 31%гача ошган бўлса, қуйи ўрта синф улуши 29%дан 41%гача кенгайган.

Беш йил давомида камбағаллик мезонидаги 11 фоиз банд қатлам заиф (Vulnerable) ёки юқорироқ қатламга кўтарилган бўлса, 24 фоиз банд заиф қатлам ўрта синф қаторига кирган.

Айни пайтда юқори ўрта синфнинг ўсиши асосан пойтахт Тошкентда қайд этилган. Юқори ўрта синфнинг ҳудудлардаги улуши 30%га етмаган бўлса, пойтахтда 71,5%га етган (Тошкентда юқори ўрта синф улуши 5 йилда қарийб 3,5 карра ошган).

Жаҳон банки мазкур ҳисоботда қуйи ўрта синф ва юқори ўрта синф мезонларини —- иқтисодий жиҳатдан хавфсиз шахслар — яъни даромад даражаси уларни қашшоқликка тушиб қолишнинг юқори хавфидан ҳимоя қиладиганлар сифатида белгилаган. Масалан, қуйи ўрта синфнинг бошланиши миллий қашшоқлик чегарасининг 2,2 баравари, юқори ўрта синфнинг бошланиши қашшоқлик чегарасининг 4,0 баравари этиб баҳоланган.

«Бугунги ислоҳотлар туфайли ўзлигимни топдим, одамларга керакли эканимни англадим. Ходимларимга ойлик берганимда, уларнинг қувончини кўриб, янада куч оламан», — дейди тадбиркор Манзура Салоҳиддинова.

Бувайда туманининг «Бачқир» маҳалласида яшовчи Манзурахон Раҳимова 🏦BRB кредити эвазига фаолиятини ривожлантираётган минглаб тадбиркорлардан бири.

Кичик хонадонда 80 млн сўмлик кредит эвазига бошланган тадбиркорлик бугун янги босқичга кўтарилди. Ҳозирда бизнес 30 нафар фуқарони иш билан таъминлаб, нафақат тадбиркорнинг, балки ўнлаб оилаларнинг ҳам даромад манбаига айланмоқда. Манзурахон эса янги мақсадлар сари интилишда давом этмоқда.

Реклама

Бозордаги чакана операциялар динамикаси ҳақида

ANORBANK тақдим этган 3 кунлик рақамлар қизиқ кўриниш ҳосил қилган.

3 кунда 117 млрд сўмлик омонатлар қўйилган, 3 816 та валюта айирбошлаш операцияси ўтказилган. Бу соатига ўртача 53 та транзакция дегани.

Энг юқори фаоллик карта очишда кузатилган – 9 125 та янги карта. Демак, ҳар 28 сонияда тизимда битта янги карта пайдо бўлган.

Рақамли банкинг сегментида транзакциялар оқими тўхтагани йўқ.

​Камбағаллик қандай қисқарди?

Жаҳон банки "Ўзбекистонда камбағалллик ва тенгликни баҳолаш " ҳисоботини эълон қилган. Унда 2021-2025 йилларда Ўзбекистонда камбағалликни қисқартириш ва ўрта синфни кенгайтириш борасидаги натижалар таҳлил қилинган.

Демак, камбағаллик кўрсаткичи ўзгаришларига оид айрим рақамлардан:

2021-2025 йиллар оралиғида мамлакатда миллий камбағаллик чегараси бўйича ўлчанадиган камбағаллик даражаси 17,0 фоиздан 5,8 фоизга камайган. Ушбу давр ичида 3,7 миллион киши камбағалликдан чиққан.

Айни даврда камбағалликка тушиб қолиш хатаридаги аҳоли (Vulnerable) улуши 46%дан 22%гача пасайган. Ушбу қатламнинг энг катта улуши Андижон вилоятида (32%). Энг паст улуши Тошкент шаҳрида (2%).

Камбағаллик даражаси 2021 йилда қишлоқ ва шаҳарда кескин фарқланган бўлса, 2025 йилга келиб фарқлар кескин қисқарган. Демак, қишлоқ жойларда камбағаллик даражаси 19,8%дан 6,4%гача тушган бўлса, шаҳар жойларда 13,9%дан 5,2%гача пасайган.

Камбағалликнинг бошқа - кўрсаткичлари: Мутлақ қашшоқлик (кунига 3 доллар) кўрсаткичи - 2,3%, камбағаллик кўрсаткичи: 4,20 кунлик даромад бўйича - 4,0%, кунига 8,30 долларлик кунлик даромад бўйича - 12,4%. Барча кўрсаткичларда аҳвол яхшиланган

Янги субсидиялар ва компенсациялар

Бугунги йиғилишда қатор соҳа ва йўналишларига оид субсидия ва компенсациялар таклиф этилди.

Пахта бўйича:
Пахтани биржада сотган фермерга ҳам, уни сотиб олган кластерга ҳам ҳар тонна учун 500 минг сўмдан субсидия берилади. Ўз ерида пахта етиштирган кластерлар эса гектарига 1,5 миллион сўмдан субсидия олади.

Экспортчилар бўйича:
тайёр маҳсулот экспортчиларининг хорижий валютадаги кредитлари бўйича фоизларнинг 5 фоиздан, миллий валютадаги кредитларининг 14 фоиздан ошган қисмини уч йил давомида компенсация қилиш бўйича ҳисоб-китобларни киритиш;
маркетплейслар орқали сотилган маҳсулот қийматининг 3 фоизини қайтариш масаласи бўйича таклифлар тайёрлаш.

Кўп ишчили корхоналарга:
Камида 1 минг нафар ишчиси бўлган корхоналарнинг ходимларни ўқитиш, малакасини ошириш ҳамда иш жойига олиб келиш ва олиб кетишдаги транспорт харажатларининг 50 фоизи компенсация қилинади.
Бундай корхоналарда камида беш йил ишлаган ходимларга фарзандларининг контракт тўлови қоплаб берилади.

Миллий орқали картани етказиб беришга буюртма беринг

Энди Миллий иловасида янги банк картасини курьер орқали Ўзбекистон бўйлаб етказиб беришга буюртма бериш мумкин.

◽️ Нархи — 25 000 сўм;
◽️ Муддати — 3 иш кунигача;
◽️ Хизмат бутун республика бўйлаб амал қилади.

Буюртма бериш учун Миллий иловасига киринг, “Дебет карталари” бўлимидан “Курьер орқали етказиб бериш” хизматини танланг, маълумотларни киритинг ва тўловни амалга оширинг.

Хизмат фақат янги карталар учун.

📞 1344
☎️ (78) 148-00-10

Instagram | Facebook | YouTube
Реклама

Аэропортни давлат қуриб, хусусий оператор бошқарадими?

Ўтган кунги йиғилишдан кейин Ахборотга интервью берган Транспорт вазири Илҳом Маҳкамов Андижон ва Наманган аэропортлари хусусий бошқарувга берилиши ҳақида гапирган.

Қизиқ тарафи, Андижон аэропортини Uzbekistan airports ўз маблағлари ҳисобига қурмоқда эди ва бир ой аввал расман очиқланган маълумотларда ҳам янги терминал ишга тушгач, аэропортни эксплуатация қилиш ҳам Uzbekistan airports зиммасида қолиши айтилганди. Аэропортни давлат қурса-ю, уни кейин хусусий операторга топширилса, бу қанақаси бўлади? Бу тажриба қаердан ўрганилди ва ўзлаштирилди? Ё ўзимизнинг ноу-хауми? Худди пулли йўлни давлат солиқ тўловчилар маблағлари ҳисобига қуриши ва кейин ҳақ ундирадиган қанақадир хусусий операторга топшириши каби бўладими?

Ўзи аэропортлар қуриш ва бошқаришда хусусий шерик жалб қилишдан мақсад ва моҳият давлат маблағларини сарфламаслик ёки тежаш эмасмиди? Андижон аэропортини хусусий бошқарувга бериш ғояси реконструкциясига 1,1 трлн.сўмгача пул сарфлаб бўлишдан аввал амалга оширилса, хатарлар ва харажатлар (танланганми, тайинланганми) хусусий операторга аввалбошдан тақсимланса бўлмасмиди?

Наманган аэропорти бошқарувига хусусий оператор жалб қилиниши эса яна битта ажабтовур хабар. Чунки Наманган аэропорти аллақачон яширин қарор билан икки йил аввал хусусий операторга топширилган эди. Ё "янги терминали июнь ойида очилади" дея ваъда қилинган аэропорт бўйича ДХШ битим бекор бўлдими? Унда янги шерик ким? У қандай танланади?

Ишни “чехиялик инвестордан” бошлаш керак

Агарда ва мабодо Тошкент шаҳар ҳокими марказга парковка керак деб ҳисобласа, буни жуда осон уддаласа бўлади.

Сенат, Марказий банк, Миллий Кутубхона ва Иқтисодиёт ва молия вазирлиги оралиғида нақ уч қаватли “парковка” турипти. Ҳокимият олдида Мажбурияти бор “инвесторнинг” (Артикходжаев ё Умрзаков олдида эмас, ҳокимият институти олдида). Ўлсин энди, минус уч қаватини парковка қиламан, деб олганку. Ё алдаганмиди?

А, унда у “чехиялик” алдаган бўлса, навбатдагиси, навбатдаги “парковкачи инвестор” алдамайдими?

Дордан қочган “инвесторларга” тинимсиз алданишга рози ва осон алданишга ризо бўп турган сизларга ким ишонади? Нега ишониши керак?

Компромисс эмас, қонун талаб қилиниши керак

Суперэкоқўмитанинг баёноти экологик экспертизадан ўтказсак, дарахтларни имкон қадар сақлаб, Миллий кутубхона ортидаги яшил маконда парковка қурсак бўлаверади, қабилида тушунилади (беихтиёр оқлаб-кўкланган Чорвоқ кейси эсга тушади). Экологларимиз қонун тўғридан-тўғри тақиқлаган бузғунчиликка лазейка кўрсатмаслиги зарур.

Олчоқ инвесторлар росмана парковка қурмоқчи бўлса, шаҳар қоқ марказида эмас, борсин-да, Беруний метрога, Олмазор метрога, Роҳат метрога киришда қурсин. Шаҳар ичига мошин жалб қилиш эмас, шаҳардан ташқарида қолдириш рағбатлантирилиши зарур. Ўнг қўл билан нима қилаяпсизлар, чап қўлингиз нима билан машғул? Уятмасми?

​Давактив қонунни ўқимаганми?

Наврўз боғи ҳудудидаги 3,2 гектар ер майдонининг хусусийлаштириш дастурига қўшиб юборилгани ва сотувларга (1, 2) чиқарилиши ҳам, Миллий кутубхона ортида 1,3 гектарлик яшил майдонда парковка қуриш соққа-лойиҳаси ҳам амалдаги қонунчиликка зид. Бутунлай зид.

2025 йил 5 майда қабул қилинган 1061- Қонунда аниқ-тиниқ қилиб ёзиб қўйилган:

"Давлат мулки бўлган ҳамда аҳолининг маданий-маиший эҳтиёжларини қондириш ва дам олиши учун фойдаланиладиган ерларни ёки уларнинг бир қисмини хусусийлаштириш ёхуд бошқача тарзда бегоналаштириш, ушбу ерларда бинолар ва иншоотларни қуриш (бундан енгил турдаги объектлар, шунингдек ободонлаштириш ва муҳандислик инфратузилмаси объектлари мустасно) ёки мавжуд бинолар ва иншоотларнинг қурилиш майдонларини кенгайтириш, шунингдек ушбу ерларнинг ҳудудини қисқартириш тақиқланади".

Давактивда қонуннинг ушбу нормасини ўқишмаганми? Пойтахт ҳокимиятида қонунни билишмайдими? Ё ушбу яшил маконларга ишқи тушган корчалон ва чўнтаклар шунчалар қудратлики, қонунни ҳам тепалаб кетиш мумкинми?

Ҳокимлар-ку, майли. Уларни топшириқларни юзи-кўзига қарамай бажарувчилар деб ҳисобласак, Давактивнинг вазифаси нима? Бу ташкилотда экспертиза, таҳлил ёки қанақадир мезонлар борми?

Дарвоқе, Давлетовўз ижтимоий соҳа объектларини хусусийлаштиришга мораторий жорий қилиниши керак, деб ёзмоқда. Бу тўғри ва адолатли талаб, қолаверса, ўзига Адолат дея ном қўйган партия 2 йил аввал шундай ваъдалар бериб, парламентдан ўрин эгаллаган (шундан бери бу ваъдаларини эслагилари келмайди). Лекин вазият шунчалик абгор ва аянчлики, бор ва мавжуд қонунлар ҳам ижтимоий ва яшил маконларни ҳимоя қилолмаса, нима қилишимиз керак? Қонунтепар ва ўзини қонундан устун деб билувчи амалдорларга адолатли жазо бўлмаса, тўхтайдими?

Хўп, мана шу кейс ёпилди, Наврўз боғи ва Миллий кутубхона ортидаги яшил маконларни бир амаллаб сақлаб қолдик, дейлик. Лекин бу Давактивни, бу ҳокимиятни қонунбузарлик ва ўзбилармонликдан ким ёки нима тийиб тура олади?

"Инвесторлар фақат шаффоф танлов асосида танланади"

Кечаги йиғилишда энергетика соҳасида иқтисодий самарадорлиги паст, молиялаштириш манбаси аниқ бўлмаган ёки узоқ вақтдан буён кечикаётган айрим лойиҳаларни қайта кўриб чиқиш зарурлиги қайд этилган. Янги қувватларни танлашда фақат уларнинг ҳажми эмас, балки электр энергияси таннархи, тармоққа уланиш имконияти, энергия сақлаш тизимлари билан уйғунлиги ва умумий энергобалансга таъсири асосий мезон бўлиши белгиланган. Энергетика соҳасидаги лойиҳалар кўп ҳолларда инвестор ташаббуси билан бошланадиган амалиётдан воз кечилиши таъкидланган.

Ахборотга интервью берган вазир Шерзод Ходжаевнинг қайд этишича (8:15дан кўринг), энди инвесторлар фақат шаффоф танлов асосида танланади. Жараён аввалдан эълон қилинган инвестицион режа асосида амалга оширилади (истеъмолчилар томонидан келиб тушаётган мурожаатлар ва таклифларни инобатга олган ҳолда инвестиция режалари портфели шакллантирилади). Буни барча инвесторлар кўриб туриш имкониятига эга бўлади.

Сиз нимани кўряпсиз? Мен ўзбек маҳсулотининг хорижий бозордаги ҳақиқий “тести”ни кўряпман

Ироқнинг Эрбил шаҳрида CONSTRUCT IRAQ 2026 кўргазмасида «Made in Uzbekistan» миллий стенди атрофидаги гавжумлик эътиборни тортади.

Бу йил давлатнинг молиявий ёрдами билан 20 дан зиёд маҳаллий ишлаб чиқарувчи 150 кв. метрлик ягона миллий стендда ўз маҳсулотларини тақдим этмоқда.

Харидор келади. Кўради. Савол беради. Тадбиркор билан гаплашади.

Энг муҳими, бундай кўргазмаларнинг натижаси фақат экспорт билан чекланмайди. Янги харидорлар — ишлаб чиқариш ҳажмининг ошиши, корхоналарнинг кенгайиши, янги иш ўринлари ва мамлакатимизга кўпроқ валюта тушуми дегани.

Нима учун 2028 йилданмас?

Минглаб корхоналарда аслида 12 фоиз бўлган ижтимоий солиқ ставкаси 1 ёки 0 фоизгача пасайтирилган. Бу ҳолат пенсия суғуртасини молиялаштиришда тенглик ва мақсадлилик масаласини юзага келтирмоқда, дея қайд этмоқда Иқтисодиёт ва молия вазирлиги.

Ўнгга-чапга берилган ижтимоий солиқ имтиёзларидан 2025 йилнинг ўзида 3,2 трлн.сўм йўқотилган.

Ислоҳот концепцяисда янги ижтимоий солиқ имтиёзларини беришни тўхтатиш, мавжуд имтиёзларни эса 2030 йилдан тўлиқ бекор қилиш таклиф этилмоқда.

Лекин нима учун айнан 2030 йилдан? Ўзбандлар ижтимоий солиқни тўлашни бошлайдиган 2027 йилданмас? Ёки пенсия ёши оширилиши бошланадиган 2028 йилданмас. Ижтимоий солиқ бўйича имтиёзларни 2030 йилни кутиб ўтирмай, эртароқ тугатишга ким ёки нима ҳалақит қилади?

Дарвоқе, бу ёқда имтиёзларни тугататамиз дея, сиёсат бошланганда, бошқа тарафда эҳтиёжманд оилалар аъзоларини ишга олган корхоналар учун ижтимоий солиқни 2 фоиз этиб белгилаш қанчалик тўғри бўлади?

Иккинчи муқобил сценарийда биринчи муқобил сценарий шартларига қўшимча равишда буғдой жаҳон нархининг шартли равишда 30 фоизга ошиши назарда тутилган. Бунда минтақада автомобиль ёнилғиси нархларининг ошиши асосий савдо ҳамкорларда ғалла ҳосилини йиғиб олиш харажатларини ошириши, шунингдек, Европада ғалла ҳосили камайиши бўйича хавотирларнинг кучайиши
ҳисобга олинган.

Ушбу сценарий доирасида ёнилғи ва буғдой нархлари ошишининг дастлабки иккиламчи таъсирлари ички бозорда буғдой уни нархининг 12,2 фоизга ва нон маҳсулотлари нархининг эса 7,3 фоизга ошиши орқали намоён бўлиши кутилмоқда. Ёнилғи нархларининг таъсири асосан тартибга солинадиган нархлар орқали юзага келса, буғдой нархларининг ошиши ун ва нон маҳсулотлари орқали бевосита базавий инфляцияга таъсир қилади. Шу сабабли мазкур сценарийда инфляцион босимнинг кенгроқ қамровга эга бўлиши кутилмоқда.

Бунда умумий инфляция 2026 йил якунида 7 фоиз даражасида шаклланиб, асосий сценарийга нисбатан 0,5 фоиз банд юқори бўлиши мумкин. Мазкур тафовутнинг 0,23 фоиз банди базавий инфляция, 0,22 фоиз банди эса тартибга солинадиган нархлар ҳиссасига тўғри келади.

Биринчи муқобил сценарийдан фарқли равишда, мазкур сценарийда умумий инфляцияга иккиламчи таъсирлар кўлами нисбатан юқори бўлиши баҳоланмоқда. Бунга жавобан асосий ставканинг қатъийлик даражаси 2027 йил якунигача асосий сценарийга нисбатан ўртача 1 фоиз бандга юқори шаклланиши натижасида умумий инфляция 2027 йил якунида 5,5 фоиз атрофида бўлиши прогноз қилинган.

​Муқобил сценарийларда инфляция прогнозлари қандай? Биринчи муқобил сценарий

2026 йилнинг II чораги бўйича Пул-кредит сиёсати шарҳида тартибга солинадиган нархларнинг ўзгариш кўлами, минтақадаги ёнилғи таклифи ва буғдой нархлари бўйича ноаниқликларни инобатга олган ҳолда, асосий сценарийга қўшимча равишда 2та муқобил сценарий доирасида инфляция прогнозлари шартли равишда баҳоланган.

Биринчи муқобил сценарийга кўра, асосий етказиб берувчи мамлакатларда нефтни қайта ишлаш қувватларининг вақтинча чекланиши ва ёнилғи экспортига жорий этилган чекловлар минтақада бензин таклифининг қисқаришига олиб келиши мумкин. Мазкур сценарийда автомобиль пропан ҳамда бензин нархларининг шартли қўшимча 15 фоизга ошиши назарда тутилган. Бунда нарх ошишининг умумий инфляцияга бирламчи тўғридан-тўғри таъсири 0,22 фоиз бандни ташкил этади.

Ушбу сценарийда умумий инфляция 2026 йил якунида 6,8 фоиз даражасида шаклланиб, асосий сценарийга нисбатан 0,3 фоиз банд юқори бўлиши мумкин. Мазкур тафовутнинг 0,22 фоиз банди тартибга солинадиган нархлар, 0,08 фоиз банди эса базавий инфляция ҳиссасига тўғри келади.

Мазкур сценарий доирасида асосий ставка 2027 йил якунигача асосий сценарийга нисбатан ўртача 0,5 фоиз банд қўшимча қатъийлаштиришни тақозо қилади. Натижада иккиламчи таъсирлар чекланган кўламда намоён бўлиши кўзда тутилган бўлиб, умумий инфляциянинг асосий сценарийдан тафовути 2027 йил IV чорагида 0,1 фоиз бандгача қисқариши ва умумий инфляция 5 фоиз атрофида шаклланиши кутилмоқда.

ХДП транспорт тарифлари ошиши ва мактаб автобуслари масаласида ўз позициясини билдирди

Тошкент жамоат транспортида йўл кира ҳақини ошириш таклифи нафақат иқтисодий, балки жиддий ижтимоий юкни юзага келтиради. ХДП расмий баёнот билан чиқиб, тарифларни белгилашда ташувчиларнинг зарарини ёпишдан аввал аҳолининг реал даромадлари ва оилавий харажатларини ҳисобга олишни талаб қилмоқда.

Шунингдек, партия пойтахтда жорий этилиши кутилаётган School Bus (мактаб автобуслари) тизими ота-оналар учун қўшимча молиявий юкка айланмаслиги кераклигини таъкидлаган. ХДП позициясига кўра, ижтимоий тенглик ва болалар хавфсизлиги устуворлиги таъминланиши керак.

Халқаро тажрибадан келиб чиқиб, ўқувчиларга имтиёзли тарифлар бериш ёки транспорт харажатларини қисман бюджетдан қоплаш таклиф этилмоқда.

Капиталбанк The Bank of New York Mellon'да корреспондентлик ҳисобрақамини очди

“Капиталбанк” АТБ дунёдаги йирик молиявий институтлардан бири – BNY (The Bank of New York Mellon) билан ҳамкорлик ўрнатиб, АҚШ долларида корреспондентлик ҳисоб рақамини очди. Мазкур қадам банкнинг тўлов инфратузилмасини диверсификация қилиб, ташқи иқтисодий фаолият юритувчи мижозлар учун халқаро ҳисоб-китоблар самарадорлигини оширишга хизмат қилади.

“BNY’да корреспондентлик ҳисоб рақамининг очилиши Капиталбанк халқаро инфратузилмасини ривожлантиришдаги муҳим босқичдир. Биз учун бу нафақат АҚШ долларида ҳисоб-китобларни амалга ошириш имкониятларини кенгайтириш, балки комплаенс жараёнларини ривожлантириш ҳамда бизнес юритишнинг халқаро стандартларига риоя этиш бўйича олиб борилган изчил ишлар натижасидир. Мижозларимизга халқаро амалиётлар учун кенгроқ имкониятлар яратиш мақсадида етакчи глобал молиявий институтлар билан тўғридан-тўғри муносабатларни ўрнатишда давом этамиз”, — дейди “Капиталбанк” АТБ Бошқарув Раисининг Биринчи ўринбосари Сардор Исмаилов.

Маълумот ўрнида, бугунги кунда “Капиталбанк” 17 та хорижий банк билан корреспондентлик муносабатларига эга бўлиб, АҚШ доллари, евро, фунт стерлинг, юан ва бошқа асосий жаҳон валюталарида ҳисоб-китобларни амалга оширмоқда. Ўз навбатида, 1784 йилда ташкил этилган BNY банки активларни бошқариш ва корпоратив банк хизматлари соҳасида глобал етакчилардан бири саналади.

Манба | Реклама