Татар халкының бөек юлбашчысы, язучы, сәясәтче һәм милли азатлык хәрәкәте эшлеклесе Гаяз Исхакыйга багышланган isxaki.com сайты яңадан эшли!

Техник һәм матди сәбәпләр аркасында сайтыбыз берникадәр вакыт эшләми торды. Хәзер исә аның эшчәнлеген тулысынча торгыздык — Гаяз Исхакый мирасына багышланган портал яңадан милләткә хезмәт итә.

isxaki.com — Гаяз Исхакыйның тормышы, иҗаты, сәяси һәм иҗтимагый эшчәнлеге турында зур электрон тупланма. Биредә Гаяз әфәнденең 50гә якын әдәби әсәре, 600дән артык публицистик мәкаләсе, хатлары һәм истәлекләре, аудиокитаплар, видеоязмалар, замандашларының аның турында истәлекләре һәм фикерләре тупланган.

Шулай ук порталда Гаяз Исхакыйның иске татар имласында басылган китаплары, ул чыгарган һәм хезмәттәшлек иткән тарихи газета-журналларның саннары, сирәк документлар һәм башка кыйммәтле материаллар белән танышырга мөмкин.

Исхакый мирасын татар телендә генә түгел, башка халыкларга да җиткерү безнең өчен мөһим. Шуңа күрә сайтта аның әсәрләренең һәм аның турындагы материалларның рус һәм төрек телләрендәге тәрҗемәләре дә урын алган.

Гаяз Исхакый мирасы — безнең тарихыбыз гына түгел. Ул бүгенге һәм киләчәк буыннар өчен дә татар милли фикере, азатлык һәм милләтебезгә хезмәт итү мәктәбе.

Рәхим итегез! Укыгыз, өйрәнегез, башкалар белән бүлешегез!

isxaki.com — Гаяз Исхакый мирасы милләткә хезмәт итүен дәвам итә.