Барыгызга да сәлам!

Дәвалануым турында бераз яңалыклар. Соңгы берничә көндә организм, әйтерсең лә, алган тимерен «эшкәртү» белән мәшгуль 😄

500 мг тимерне тамыр аша керткәннән соң башта хәлләр әйбәт кенә иде. Әмма бераз вакыт узгач организм үзенең дә фикере барлыгын күрсәтә башлады 😄 Хәлсезлек, вакыт-вакыт шактый көчле баш авыртуы, авызда тимер тәме һәм гомумән авыз эчендә сәер уңайсызлык барлыкка килде. Соңрак арка, җилкә, ботлар, мускуллар сызлый, хәлсезләнә башлады.

Кыскасы, әллә ни куркыныч нәрсә юк кебек, әмма организм сиңа бик ачык итеп: «Дустым, бүген без гадәти режимда эшләмибез», — дип тора 😄

Иң кызыгы — бу реакция дулкын-дулкын килә. Бер мәлне: «О, бетте бугай, җибәрде!» — дип сөенәсең. Берничә сәгать үтә дә, хәлсезлек белән мускуллар сызлавы яңадан исәнләшергә килә.

Кичә дә үземне бер мәлне ярыйсы гына хис иткәч: «Исән бит әле, аяклар да йөри, ник 10 чакрым йөреп кайтмаска?» — дигән искиткеч акыллы фикер килде 😂 Кичкә таба организмның бу инициативамны бөтенләй хупламавы ачыкланды. Йөреп кайтканнан соң хәлсезлек тә, башка билгеләр дә шактый ныграк сизелә башлады.

Бүген иртән дә хәлсезлек белән уяндым. Соңрак мускуллар һәм баш та үзләрен яңадан искә төшерде. Шуңа күрә хәзер инде батырлык күрсәтмичә генә: күбрәк ял, су, нормаль ашау һәм мөмкин кадәр азрак физик эш.

Чынлыкта, тимерне тамыр аша керткәннән соң организмның мондый реакциясе әллә ни сирәк күренеш түгел. Кыска вакыт эчендә организм шактый зур күләмдә тимер ала, аны эшкәртергә һәм тиешенчә таратырга кирәк. Шуңа кайбер кешеләрдә вакытлыча хәлсезлек, баш авырту, мускуллар сызлау, тәм сизү үзгәрү һәм авырып киткәндәге кебек ватылып тору күзәтелергә мөмкин. Рәхәт түгел, әлбәттә, әмма күпчелек очракта бу вакытлыча хәл.

Ә дәвалану дәвам итә 💉

Бүген — чираттагы B12 витамины уколы. Соңгы вакытта организм югалткан һәм җитмәгән нәрсәләрне әкренләп тулыландырабыз, күрсәткечләрне дә кеше рәтенә кертергә тырышабыз 😄

Ә иртәгә, бүгенге хәл тынычланса һәм организм каршы килмәсә, чираттагы этап — тагын 500 мг тимерне тамыр аша кертү. Шулай итеп, бу курс кысаларында барлыгы 1000 мг тимер булачак.

Беренче 500 мг-нан соң нәрсә көтәргә мөмкин икәнен хәзер инде азмы-күпме беләм. Шуңа күрә бу юлы процедурадан соң 10 чакрымлык сәяхәтләр дә, организмга «монда кем хуҗа» икәнен исбатларга маташулар да булмас 😂 Тыныч кына үз эшен эшләсен.

Кыскасы, дәвалану бара. Кайчак мин теләгәннән әкренрәк, кайчак авыррак, кайчак бөтенләй күңелле түгел. Әмма иң мөһиме — алга барабыз.

Әкренләп хәлне җыеп, яңадан сафка басабыз!