"Аԥсны акоманда" абаҩхатәра злоу анапхгаҩцәа раарԥшра адагьы, атәылазы ихәарҭоу аидеиақәа рынагӡаразы илшароуп иҳәеит аҳәынҭқарра ахада Бадра Гәынба.

Аицлабра аҩбатәи асезон аркраан дықәгыло атәыла ахада иазгәеиҭеит, актәи асезон аихшьаалақәа апроект хра аманы ишыҟоу шаадырԥшыз.

"Агәра ганы сыҟоуп шәаргьы ишшәымоу ҳтәылазы ихәарҭахаша аидеиақәа, апроектқәа. Наҟ-наҟ аус ахьыжәулозаалакгьы — зехьынџьара ихадароу шәдыррақәеи, шәымчхареи, шәаԥшьгареи ҳҳәынҭқарра аҿиара иазырхазароуп", — иҳәеит ахада.

Гәынба дазааҭгылеит аицлабра алҵшәақәа ирыхьмырԥшыкәа Аԥсны анапхгара афиналистцәеи аиааира згази рыбжьара аҭакзыԥхықәу аҳәынҭқарратә маҵурақәа рахь инашьҭхо ауаа ралыԥшаара ишалаго.

"Аԥсны акоманда", ари аицлабра алахәылацәа рымацара ракәӡам, уи зыԥсадгьыл зыхьчо, абаҩхатәра злоу ҳҿар роуп. Азинхьчаратә усбарҭақәа русзуҩцәа роуп, есҽны зџьабаала ҳтәылауаа рыԥсҭазаара еиӷьызтәуа аҵареи, агәабзиарахьчареи, егьырҭ аусхкқәеи рсистема аусзуҩцәеи ахаҭарнакцәеи роуп", — иҳәеит ахада.