Афон ҿыц авокзал аиҭашьақәыргылара хыркәшоуп.

Уаҟа ахыб рыԥсахит, азыԥшратә зали атехникатә уадақәеи дырҿыцит. Иара убас аперрон аҿы ахаҳәцәы ҿыц карыԥсеит, адәахьтәи атәарҭақәа рыԥсахит.

"Аусурақәа зегьы "Аԥснытәи аихамҩа" ахатә ԥарақәа рыла имҩаԥгоуп", — ҳәа Аԥсуа телехәаԥшра иазеиҭеиҳәеит Аԥсны аихамҩа апассаџьыртә маҵзура аиҳабы ихаҭыԥуаҩ Емир Агрба.

Иара иазгәеиҭеит, аӡынтәи аамҭазы авокзал Москвантәи адәыӷбақәеи афымцадәыӷба "Диоскуриа" шаднакыло. Аԥхын урҭ ирыцлоит Петербургынтәи ареисқәа.

Ирҿыцу ахыбра официалла аартра хара имгакәа имҩаԥгахоит.