#قائم_آل_عبا
#تانری‌نین گؤندردییی سونونجو ایشیقلی گونش، پیغمبر حضرت‌لری اوچون
#حکیم_محمد_فضولی
[فضولی قاغانین شاهکاری]

ساچما ای گؤز اشکدن کؤنلومده‌کی اوْدلاره سو
کیم بو دَنلی توتوشان اوْدلاره قیلماز چاره سو

آبگوندور گنبدِ دوّار رنگی، بیلمه زم
یا محیط اوْلموش گؤزومدن، گنبدِ دوّاره سو؟

ذوقِ تیغیندن عجب یوخ اوْلسا کؤنلوم چاک-چاک
کیم مرور ایلن بوراخیر رخنه‌لر دیواره سو

وَهم ایلن سؤیلر دلِ مجروح پیکانین سؤزون،
احتیاط ایلن ایچر هر کیمده اوْلسا یاره، سو

سویا وئرسین باغبان گۆلزاری زحمت چکمه‌سین،
بیر گۆل آچیلماز اۆزون تک وئرسه مین گۆلزاره سو!

اوْخشادا بیلمز غبارینی محرّر، خطّینه
خامه تک باخماقدان ائنسه گؤزلرینه قاره سو

عارضین یادیله نمناک اوْلسا مژگانیم، نولا؟
ضایع اوْلماز گۆل تمناسیله وئرمک خاره سو!

غم گۆنو ائتمه دلِ بیماردان تیغین دریغ
خیردیر وئرمک قارانقو گئجه‌ده بیماره سو

ایسته پیکانین کؤنول، هجرینده شوْقوم ساکن ائت
سوسوزام، بیر کز بو صحرادا منیمچون آره سو

من لبین مشتاقییام، زُهّاد کوثر طالبی
نئته کیم مسته مِی ایچمک خوش گلیر، هشیاره سو!

روضه‌ی کویونا هر دم دوْرماییب ائیلر گذار
عاشق اوْلموش غالبا، اوْل سروِ خوش‌رفتاره سو

سو یوْلون اوْل کویدان توپراق اوْلوب توتسام گرک
چون رقیبیم‌دیر داخی، اوْل کویه قویمان واره سو

دستبوسو آرزوسیله گر اؤلسم، دوستلار
کوزه ائیلین تورپاغیم، سونون اوْنونلا یاره، سو

سرو سرکشلیک قیلیر قمری نیازیندان، مگر
دامنین توتا، آیاغینا دۆشه، یالواره سو

ایچمک ایستر بۆلبولون قانین مگر بیر رنگ ایله
گۆل بوداغی‌نین مزاجینه گیره قورتاره سو!

طینتِ پاکینی روشن قیلمیش اهلِ عالمه
اقتدا قیلمیش طریقِ احمدِ مختاره سو

سیدِ نوعِ بشر، دریای دُرِّ اصْطَفی
کیم سَپیبدیر معجزاتی، آتشِ اشراره سو

قیلماق ایچون تازه گۆلزارِ نبوت رونقین
معجزیندن ائیله‌میش اظهار سنگِ خاره سو

معجزو بیر بحرِ بی‌پایان ایمیش عالمده کیم
یئتمیش اوندان مین-مین آتشخانه‌ی کفاره سو

حیرت ایلن بارماغین دیشلر کیم ائتسه استماع
بارماغیندان وئردیگی شدّت گۆنو انصاره سو

دوستو گر زهرمار ایچسه، اوْلور آبِ حیات
خصمی سو ایچسه، دؤنر البته زهرِ ماره سو

ائیله‌میش هر قطره‌دن مین بحرِ رحمت موج‌خیز
ال سونوب اورجاق وضو ایچون گۆلِ رخساره سو

خاکِ پایینا یئتم دئر، عمرلردیر متصل
باشینی داشدان-داشا ووروب گزر آواره سو

ذرّه-ذرّه خاکِ درگاهینا ایستر سالا نور
دؤنمز اوْل درگاهدان، گر اولسا پاره-پاره سو

ذکرِ نعتین وِرد-ینی، درمان بیلیر اهلِ خطا
ائیله کیم دفعِ خمار ایچون وئره مِی‌خواره سو

یا حبیب الله! یا خیر البشر! مشتاقینام
ائیله کیم لب تشنه‌لر یانیب دیلر همواره سو

سنسن اوْل بحرِ کرامت، کیم شبِ معراجدا
شبنمِ فیضین یئتیرمیشن ثابت و سیّاره سو

چشمه‌ی خورشیددن هر دم زلالِ فیض ائنر
حاجت اوْلسا مرقدین تجدید ائدن معماره سو

بیمِ دوزخ، نارِ غم سالمیش دلِ سوزانیما
وار امیدیم ابرِ احسانین سپه اوْل ناره سو

یُمنِ نعتیندن گهر اولموش "فضولی" سؤزلری
ابرِ نیساندان دؤنن تک لؤلؤی شهواره سو

خوابِ غفلتده اوْلان، بیدار اوْلاندا روزِ حشر
اشکِ حسرتدن دوْلاندا دیده‌ی بیداره سو

اومدوغوم اوْلدور کی روز حشر محروم اولمایام
چشمه‌ی وصلین وئره من تشنه‌ی دیداره سو.

#حکیم_محمد_فضولی
#سو_کیمی_شعر
#سؤزون_سؤزو
@sozun_sozu