ШАЙХ АЙМАН СУВАЙД ИШТИРОКИДАГИ ДАРСЛАР ЯКУНИГА БАҒИШЛАНГАН ТАДБИР БЎЛИБ ЎТДИ

Ўзбекистон мусулмонлари идораси мажлислар залида 2026 йил 28-центабр – 10-октабр кунлари бўлиб ўтган "Ат-Тажвид ал-Мусаввар" китоби бўйича тажвид курси, Аллоҳнинг фазли ила, ўз ниҳоясига етди.

Бугун, 2026 йил 10-октабр куни ушбу илмий тадбир якунига бағишланган тантанали маросими бўлиб ўтди. Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Шайх Айман Сувайд ҳазратлари ҳамда Шайх Али Файзуллоҳ Махдум иштирок этдилар.

Тадбирда муфтий Шайх Нуриддин Холиқназар ҳазратлари сўзга чиқиб, юртимиз тарихида илк бор ташкил қилинган ушбу тажвид дарслари учун Ўзбекистон мусулмонлари идораси номидан Шайх Айман Сувайдга ташаккур билдирди. Ушбу дарслар Президентимизнинг Қуръон таълимига бўлган эътиборининг натижаси эканини таъкидлаб, икки ҳафта давомида Идоранинг мажлислар зали “Қуръон боғи”га айланганини эътироф этди. Шунингдек, дарсларда иштирок этган ўқитувчи-устозлар Шайх Айман Сувайддан олган фойдали билимларини келгусида минглаб шогирдларига ўргатишларига умид билдирди.

Сўнг Шайх Айман Сувайд сўз олиб, Президентимизнинг олиб бораётган тинчлик сиёсатига ҳамда соф Ислом динини ёйиш йўлидаги хизматларини эътироф этди. Шу билан бирга, тадбирларнинг юксак даражадаги ташкилот қилингани ва Ўзбекистоннинг “Ўрта Осий минораси” тараққий этаётганини таъкидлаб ўтди.

Якунда Шайх Али Файзуллоҳ Махдум Шайх Айман Сувайд қаламига мансуб “Суратли тажвид” китобини айнан ўзларининг муборак оғизларидан талаққий қилингани бизга берилган Аллоҳнинг буюк фазли ва инъоми эканини айтиб ўтди. Шунингдек, Юртимизнинг гуллаб-яшнашига, мамлакатимиз тараққиётига ва айнан, илму маърифатнинг ривожланишига бош-қош бўлиб турган муҳтарам Юртбошимиз Шавкат Мирзиёев жанобларига ҳамда динимиз ривожига ўзининг забардаст хизматларни қилиб келаётган ва айнан, Қуръони карим йўлида беқиёс хизмат кўрсатаётган муҳтарам Шайх Нуриддин Холиқназар муфтий ҳазратларига чексиз миннатдорлик билдирилди. Сўзининг сўнгида, Шайх Айман Рушдий Сувайд ҳазратларига ҳам ташаккур изҳор қилиб, диёримизга яна илму маърифат таратиш учун такрор-такрор келишларига тилак билдирди.

Тадбир сўнгида Шайх Айман Сувайд иштирокида бўлиб ўтган назарий ва амалий машғулотларда қатнашган тингловчиларга тингловчилик гувоҳномалари ҳамда ташкилотчиларга тақдирлов сертификатлари тантанали равишда топширилди.

@quranuz