Беларускі ПЭН

Сёння ва Уроцлаве – куды толькі нас ні закідвае цяпер лёс – тутэйшыя беларусы сабраліся ў гасцінным Ossolineum на творчую сустрэчу з трыма палачанамі: старшынёй Беларускага ПЭНа Таццянай Нядбай, празаікам, паэтам і даследчыкам Уладзімірам Арловым і перакладчыкам, грамадскім дзеячам Лявонам Баршчэўскім.

Творцы сучасныя, а гаварылі пра рэчы вечныя: пра Полацак як калыску Беларусі, пра літаратуру і памяць, пра тое, адкуль мы і куды ідзём. І, вядома, пра кнігі.

А нагода ёсць асаблівая: толькі-толькі выйшаў першы ў гісторыі беларускай літаратуры поўны пераклад “Адысеі”, зроблены Лявонам Баршчэўскім. Яна завяршыла вялікую перакладчыцкую трылогію – “Іліяда”, “Энеіда”, “Адысея”.

Вечарына называлася, дарэчы, “Сабраліся палачане…”. А калі збіраецца такая полацкая троіца – чакай сюрпрызаў.
І дачакаліся.
Напрыканцы цёплай сустрэчы выступоўцы абвясцілі пра заснаванне новай кніжнай серыі – паэтаў Полацка. Яе назва – “…пачаўся свет”. Ужо вядомыя адзінаццаць аўтараў будучай серыі.
Так што Полацак толькі пачынаецца. Чакаем!

Суарганізатары імпрэзы: Ossolineum, SDK, KEW і Беларускі ПЭН.
Падзея з’яўляецца часткай праекта «Партнёрства ў дзеянні», суфінансаванага са сродкаў міністра культуры і нацыянальнай спадчыны ў межах праграмы Нацыянальнага цэнтра культуры «Культура – інтэрвенцыі. Эдыцыя 2026».

Ужо заўтра ва Ўроцлаве можна сустрэцца з выбітнымі прадстаўнікамі полацкай зямлі!

Запрашаем на сустрэчу з Уладзімірам Арловым, Лявонам Баршчэўскім і Таццянай Нядбай – трыма беларускімі аўтарамі, звязанымі з Полацкам. Пагаворым пра іх творчасць, новыя кнігі, Полацк і яго месца ў беларускай культуры, а таксама пра іншыя важныя і не надта сур’ёзныя справы. Будзе таксама час на пытанні і размову з публікай.

На сустрэчы можна будзе набыць і падпісаць кнігі.

⏰ 22 верасня, 17:00
📍 Канферэнц-зала Асалінэума
пл. Нанкера, 17 (pl. Nankiera 17), Уроцлаў
уваход з боку Барочнага саду Асалінэума

Суарганізатары імпрэзы: Ossolineum, SDK, KEW і Беларускі ПЭН.

Падзея з’яўляецца часткай праекта «Партнёрства ў дзеянні», суфінансаванага са сродкаў міністра культуры і нацыянальнай спадчыны ў межах праграмы Нацыянальнага цэнтра культуры «Культура – інтэрвенцыі. Эдыцыя 2026».

Рэцэнзіі на шорт-ліст прэміі Гедройця: Авантуры ягонага жыцця…

Публікуем рэцэнзіі, напісаныя сябрамі журы прэміі на кнігі з кароткага спіса. Сёння Сяргей Кавалёў разбірае сямейную сагу «Радзіна» Збыха Слупоўскага (Галіяфы, Maraton, 2025):

"Хаця раман называецца «Радзіна», значную яго частку займаюць каларытныя апісанні жыцця галоўнага героя, апавядальніка і аўтара кнігі: напрыклад, апісанні ягоных студэнцкіх і аспіранцкіх гадоў (згадваюцца знаёмыя шмат каму з пакалення «Тутэйшых» інтэрнаты на Акадэмічнай і Шырокай у Мінску), сталення яго як навукоўца і пісьменніка, замежныя вандроўкі і прыгоды ў экзатычнай Бразіліі, вяртанне ў Беларусь і падзеі 2020 года, якія закранулі амаль кожную беларускую сям’ю".

👉 Чытайце поўны тэкст рэцэнзіі.

Запрашаем на фінальную цырымонію прэміі:
⏰ 7 лістапада
📍 Еўрапейскі цэнтр салідарнасці, Гданьск
Сачыце за навінамі на сайце прэміі.

Арганізатары прэміі: Беларускі ПЭН і Міжнародны саюз беларускіх пісьменнікаў.

Таццяна Нядбай узяла ўдзел у дыскусіі «Актуальнасць Гедройця?»

У сераду ў Львове прайшла 111-я Асалінская сустрэча – юбілейная падзея праекта, які ўжо 20 гадоў стварае прастору для дыялогу пра гісторыю, культуру і будучыню Цэнтральна-Усходняй Еўропы.

У сваім выступе Таццяна Нядбай звярнулася да досведу Ежы Гедройця і парыжскай «Культуры» як да прыкладу паслядоўнай працы на будучыню. Для беларускай культуры сёння гэта азначае захоўваць і развіваць інстытуцыі, выдаваць кнігі, падтрымліваць мову і памяць, будаваць міжнародныя сувязі і працягваць размовы, якія немагчыма свабодна весці ў Беларусі:

«Эміграцыя не мусіць быць залай чакання. Яна можа быць месцам, дзе рыхтуецца будучыня краіны. Мы, беларусы, не ведаем, калі адбудуцца змены і колькі з нас вернецца. Але гэта не значыць, што мы павінны чакаць».

📸 Фота: Данута Качыньска