Rusiya hökuməti tərəfindən hazırlanmış 2027-ci il federal büdcə layihəsinə əsasən, Rusiyanın 2027-ci ildə ümumi müdafiə xərclərinin 17,1 trilyon rubl təşkil etməsi nəzərdə tutulur. Bu, 2026-cı il üçün nəzərdə tutulan 12,9 trilyon rubl ilə müqayisədə 32,2% çoxdur.

Sənədlərə əsasən, Rusiyanın 2027–2029-cu illərdə ümumi müdafiə xərcləri 50 trilyon rubl təşkil etməlidir.

Sənədlərdə həmçinin qeyd olunur ki, hökumət Rusiyanın 2026-cı il üzrə büdcə kəsiri proqnozunu əvvəlki 1,6%-dən 3,2%-ə yüksəldib. Rusiyanın 2026-cı ildə büdcə xərclərinin 13,2% artaraq 48,6 trilyon rubla çatacağı və bunun ÜDM-in 20,9%-nə bərabər olacağı gözlənilir.

Bununla belə, görünür ki, Rusiyanın həm 2026, həm də 2027-ci illərdə faktiki hərbi xərcləri planlaşdırılan göstəricilərdən daha yüksək olacaq. Daha əvvəl bildirilmişdi ki, artıq 2026-cı ilin ilk yarısında Rusiyanın hərbi xərcləri 10,687 trilyon rubl təşkil edib.