“Duvarak” nima degani?

Bu soʻz asli forscha boʻlib, ikkinchi marta, ikkilamchi degan maʼnolarga ega. Ogʻzaki tilda bu soʻzni kichik, mayda maʼnosida ham ishlatamiz. “Izohli lugʻat”da duvarak quyidagicha izohlangan:

1. Mevali daraxtning bir yilda ikkinchi bor bergan mevasi.

Duvarak olma. Olmaning duvaragi.

Bir yillik novdalarda yetilayotgan uzum boshlari bilan bir qatorda bachki novdalarda duvarak paydo boʻlishi mumkin.
“Fan va turmush”.

Baʼzi shoxlarda bultur chala terilgan mevalar – duvarak olxoʻrini eslatuvchi zaytunlar qurishib yotardi.
H. Gʻulom, Zamin yulduzlari.

2. Koʻchma maʼnoda: boʻyi past, pachoq (odam haqida).

Duvarak odamlar.

Yoʻldosh pochtachining duvarak qizicha ham boʻlolmaysan, sendan yosh, lekin oʻn hissa koʻp ishlaydi.
“Yoshlik”.

3. Koʻchma maʼnoda: xom, gʻoʻr; tajribasiz.

Kelganiga bir yil, yarim yil boʻlib qolganlar bor... duvarak boʻlsa ham, pulni puflab tugadiganlar – bularni oz-moz pul bilan ragʻbatlantirish mumkin.
A. Muxtor, Tugʻilish.

4. Umuman, har narsaning kichkinasi, yetilmagani.

Poyezd meni kichkinagina, nomi hali temir yoʻl xaritalariga kirmagan duvarak bir razyezdga tashlab oʻtib ketdi.
S. Ahmad, Qadrdon dalalar.

– Avrab ham boʻlmaydi bu duvaraklarni, – arz qildi Ubayda xola xit boʻlib.
SH. Toshmatov, Tongdagi koʻlanka.

@oriftolib | Sahifalarimiz