Bizga qo‘shnilarimiz haqida kim gapirib beryapti?

Markaziy Osiyoda siyosiy kelishuvlar, chegaralar ochilishi va iqtisodiy o‘sish - bularning hammasi muhim.

Va davlatlar darajasidagi bu yutuqlarning eng mustahkam poydevori xalqlarimiz o‘rtasidagi samimiy va chinakam ishonch.

Samarqandda o‘tayotgan Markaziy Osiyo fuqarolik jamiyati forumida aynan shu masala ko‘tarildi.

Bugun biz axborot emas, ishonch tanqisligi davrida yashayapmiz. Bu sharoitda voqelikning buzib ko‘rsatilishi, manipulyatsiya va feyklar jamoatchilik fikriga jiddiy ta’sir qilishi mumkin.

Masalaning yana bir o‘ta nozik tomoni bor. Markaziy Osiyo aholisining o‘rtacha yoshi bor-yo‘g‘i 29 da. Umumiy kelajagimiz mana shu raqamli avlodning qo‘lida. Biz ularga media orqali nimani taqdim etyapmiz?

Shuning uchun, biz mintaqa OAVlari va fuqarolik jamiyati o‘rtasida doimiy ishlaydigan aniq mexanizm, qo‘shma media loyihalar va faktcheking bo‘yicha tizimli hamkorlikni amalga oshirishimiz zarur.

Biz ilgari surayotgan mintaqaviy media hamkorlik turli xil qarashlar sof faktlarga tayanadigan, milliy manfaat va qadriyatlar hurmat qilinadigan maydon.

Davlat rahbarlari mintaqada devorlar o‘rniga ko‘priklar qurdi. Siyosat o‘z so‘zini aytdi. Ana shu ko‘priklarni mustahkam ushlab turish media va jamiyatning yelkasidagi vazifa.

Odiljon Tojiyev