Халық Кеңесі: сабақтастық пен жаңа буын

Жаңа Конституция негізінде қалыптасып жатқан маңызды институттардың бірі - Қазақстан Халық Кеңесі. Енді оның құрамы жасақталатын кезеңге де жақындадық.

Халық Кеңесі - қоғамдық пікір мен мемлекеттік ұстанымның тоғысатын консультативтік алаңы. Сондықтан оның құрамына кімдердің енетіні қоғам үшін де маңызды мәселе.

Құрылтайдың жаңа құрамынан біз қоғамдық-саяси ортадағы жаңарудың айқын белгілерін көрдік. Әртүрлі саладан келген жаңа буын өкілдері, кәсіби мамандар, қоғамдық бастамаларда жүрген азаматтар мемлекеттік деңгейдегі пікірталасқа кеңінен тартылды.

Енді осындай жаңарудың Халық Кеңесінің құрамынан да көрініс табатынын күтуге болады.

Әсіресе соңғы жылдары қоғамдық кеңестерде, үкіметтік емес ұйымдарда, сарапшылық және кәсіби ортада, өңірлік қоғамдық бастамаларда белсенді жұмыс істеп жүрген азаматтардың тәжірибесі бар. Олардың арасында елдің қоғамдық-саяси өміріне араласуға дайын, мемлекеттік мүддені түсінетін, қоғамның сұранысын білетін, жасампаз ұстанымы бар жаңа буын қалыптасып келеді.

Бәлкім, Халық Кеңесінің жаңарған құрамынан біз осы ортаның өкілдерін де көрерміз.

Бұл ретте жаңару сабақтастықпен қатар жүргені маңызды. Бұған дейін ұлттық қоғамдық диалог алаңдарында еңбек еткен азаматтардың тәжірибесі де жаңа институттың қалыптасуына қажет.

Сондықтан алдағы құрамнан тәжірибе мен жаңа буынның, сабақтастық пен жаңарудың табиғи үйлесімін көру қызықты болмақ.

Өйткені әділетті әрі прогрессивті Қазақстанды құру - тек мемлекеттік институттардың міндеті емес. Бұл іске қоғамдық жауапкершілігі жоғары, ел болашағына сенетін және оны құруға дайын азаматтардың да белсенді қатысуы маңызды.

Халық Кеңесінің жаңа құрамы қоғамдағы осы өзгерістердің қаншалықты деңгейде көрініс табатынын көрсететін маңызды көрсеткіш болмақ.