10 кастрычніка, у Сусветны дзень супраць смяротнага пакарання, у Варшаве адбыўся першы футбольны турнір «Футбол за жыццё», арганізаваны ў межах Тыдня супраць смяротнага пакарання ў Беларусі.
На поле выйшлі змяшаныя каманды, у складзе якіх гулялі і хлопцы, і дзяўчаты. Пераможцай турніру стала міжнародная каманда, якая аб’яднала ўдзельнікаў з Беларусі і Украіны. Па выніках гульняў удзельнікі атрымалі медалі, а пераможцы — кубак.
💬 Падчас турніру каардынатар кампаніі «Праваабаронцы супраць смяротнага пакарання ў Беларусі» Андрэй Палуда нагадаў, чаму важна гаварыць пра праблему смяротнага пакарання ў самых розных фарматах.
«Мы заўсёды шукалі розныя, на першы погляд нетрадыцыйныя спосабы, каб прыцягнуць увагу да гэтай праблемы. Шмат гадоў таму ў Беларусі праходзіў „Рок за жыццё“ — канцэрты супраць смяротнага пакарання, якія ладзіліся ў Мінску, Віцебску, Магілёве і Брэсце. Цяпер у нас з’явіўся яшчэ адзін кірунак — спартыўны», — адзначыў праваабаронца.
Арганізатарская каманда спадзяецца, што «Футбол за жыццё» стане штогадовай традыцыяй і будзе збіраць усё больш людзей вакол тэмы права на жыццё.
«Вельмі хочацца, каб ужо ў найбліжэйшай будучыні на такіх турнірах мы гаварылі не пра тое, што ў Беларусі існуе смяротнае пакаранне, а пра тое, што яно нарэшце адмененае», — падкрэсліў Андрэй Палуда.
❤️ Дзякуй усім, хто выйшаў на поле, падтрымліваў каманды і дапамог правесці наш першы турнір!