شول لب شیرینه یارب! گر شکر دئرسم نولا؟
شول گۆنش طلعتلی آیا گر قمر دئرسم نولا؟
آدمی نوعوندا مثلین گؤرممیش دؤور فلک
شول جهتدن گر سنا خیر البشر دئرسم نولا؟
شول گۆل اۆزره داغیلان عنبر صفتلی سونبۆله
عنبر و ریحان، عجب! یا مشک تر دئرسم نولا؟
بیلمه ین عشقین طریقین شول خبرسیز جاهیله
چۆن هدایت بولمامیش، گر بی خبر دئرسم نولا؟
سنسیز ای جان و جهان بیر پولا دگمز کائنات
هیچه دگمز، نسنه یه، گر شول قدر دئرسم نولا؟
کیم کی حققی پرده سیز یۆزۆنده ای جان گؤرمه دی
بی بصیرتدیر آنا گر بی بصر دئرسم نولا؟
گر یۆزۆن آیین گؤرنه ای جهانین فتنه سی!
شبهه سیز حققی گؤرن صاحب نظر دئرسم نولا؟
نور ایماندیر جمالین کیم کی صد‌ّقنا دئمز
کافر و مشرکدیر آنا دیو اگر دئرسم نولا؟
زلف و رخساریندیر ای جان سوره ی نور و دخان
گر بو معنی دن آنا شام و سحر دئرسم نولا؟
چۆن نسیمی نین مقامی قاف ایمیش عنقا ایله
شول معلا قدره گر عالی گؤهر دئرسم نولا؟
#شهیدالشعرا_مولانا_امیر_سید_عمادالدین_نسیمی
مصحح: #هاتف_بخشی
مدرس زبان و ادبیات فارسی
ایفا: خانم #زهرا_ذوالقدر
@Nasimi771
@sahateshgh
➖➖➖➖➖