❤️ آغریماز
جانه سندن هر نه کیم گلسه جیگرلر آغریماز
حق بیلیر بیر نوش اوچون مین نیش اورارلار آغریماز
یاری سئومک دن میدیر یا آشنالیقدان می کیم؟
جسمیمی سر تا قدم مین کز یارارلار آغریماز
جهلِ نامردین قاچان میدان دمینده یئری وار؟
اّر بیلیر بو قدرِ میدان کیم قدَرلر آغریماز
شیشه‌می چون داشه چالدیم، حقّی اظهار ائیله‌دیم
بوندان احوَل آغریدی صاحب بصرلر آغریماز
قاضی نین کور فتوا سیندان سویدولار ناحق منی
غم دگیل سندن شها گئرچک نظرلر آغریمار
زاهیدین بیر بارماغین کسسن قاچار حقدن دؤنر
گؤر بو گئرچک عاشقی سرپا سویارلار آغریماز!
سویون ای موردار ساللاخلار، «نسیمی»نین تنین
بونجا نامردی گؤرون بیر ار قینارلار آغریماز
#سیدعمادالدین_نسیمی
شعری بو گونکی دانیشیغیمیز دیلینه اویغونلاشدیر میشیق.
قافیه لر ال یازمالاردا ترتیب ایله بئله گلیب دیر:
جیگرلر، اورّرلر، یّرّرلر، قّدرلر، بصرلر، نظرلر، سویّرلر، قینّرلر
لاپ اسکی و معتبر ال یازمالار ایله بو شعر تصحیح اولوندو.
مصحح: #هاتف_بخشی
#شهید_الشعرا_مولانا_امیر_سید_عمادالدین_نسیمی
➖➖➖