Sharof Rashidov tumanida umumta’lim muassasalarida tashkil etilgan “Vatan tayanchi” otryadlari a’zolari ishtirokida o‘quv-uslubiy seminar mashg‘uloti o‘tkazildi.

Yoshlarni vatanparvarlik ruhida tarbiyalash, ularning harbiy xizmatga bo‘lgan qiziqishini oshirish hamda bilim va ko‘nikmalarini mustahkamlashga qaratilgan tadbirda otryad a’zolari, ularning ota-onalari va otryad rahbarlari ishtirok etdi.

Seminar davomida Jizzax garnizoni harbiy xizmatchilari tomonidan o‘quv nuqtalari tashkil etilib, ishtirokchilar ko‘rgazmali o‘quv qurollari bilan tanishtirildi. Yoshlarga harbiy xizmatning mazmun-mohiyati, intizom va mas’uliyatning ahamiyati haqida tushunchalar berildi.

Shuningdek, “Vatan tayanchi” otryadlari faoliyatini jadallashtirish, ularning nufuzini oshirish, oliy ta’lim muassasalari hamda muddatli harbiy xizmatga oid ma’lumotlar yetkazildi.