Сёння — 179 год са дня нараджэння Эдварда Вайніловіча, фундатара Чырвонага Касцёлу ў Мінску

Эдвард Вайніловіч (1847-1928) — выбітны беларускі мецэнат, палітычны дзеяч ліберальнага накірунку і рэфарматар сельскай гаспадаркі.

Яшчэ ў царскія часы ён падтрымліваў аўтаномію свайго краю ў складзе Расійскай імперы, развіццё сістэмы бясплатнай пачатковай адукацыі, прававую роўнасць народаў, моў, культур і іншыя прагрэсіўныя крокі.

Пасля падзення самадзяржаўя, у канцы кастрычніка 1918 г. Вайніловіч увайшоў у якасці члена ў склад Рады БНР, а ў лістападзе 1918 г. падтрымаў ідэю стварэння канстытуцыйна-манархічнай дзяржавы Вялікае Княства Літоўска-Беларускае пад нямецкай апекай.

Пасля заняцця Мінску бальшавікамі эміграваў у Польшчу, дзе адышоў ад актыўнай палітычнай дзейнасці. Аднак за прабеларускія погляды у Другой Рэчы Паспалітай яго да смерці называлі "апошнім беларускім баярынам".

У 2006 годзе перапахаваны ў Мінску, ля касцёла Святога Сымона і Алёны, які быў пабудаваны на ягоныя ж грошы ў 1905-1910 гадах.