Два гады са дня смерці палітвязня Дзмітрыя Шлетгаўэра

11 кастрычніка 2024 года ў магілёўскай калоніі №15 загінуў 22-гадовы палітвязень Дзмітрый Шлетгаўэр, асуджаны на 12 гадоў за «шпіянаж» і «садзейнічанне экстрэмізму». У пасведчанні аб смерці пазначана механічная асфіксія. Ён загінуў у ШІЗА неўзабаве пасля прыбыцця ў калонію.

Шлетгаўэр быў грамадзянінам Расіі з беларускім ДНЖ, жыў і працаваў у Камянцы. Падчас яго знаходжання ў СІЗА нарадзіўся сын. Сваякі не верылі, што ён планаваў самагубства: мужчына падтрымліваў сувязь з сям’ёй і збіраўся прасіць аб памілаванні.

Былыя вязні ПК-15 распавядаюць, што палітвязняў пасля этапу часта адразу змяшчалі ў ШІЗА і падвяргалі моцнаму псіхалагічнаму ціску. Паводле іх сведчанняў, пасля смерці Шлетгаўэра адміністрацыя абмежавала званкі, каб інфармацыя не трапіла вонкі.

Некаторыя былыя зняволеныя звязваюць трагедыю з ціскам адміністрацыі і аператыўнага супрацоўніка Іллі Кіслякова, аднак падкрэсліваюць, што дакладныя абставіны смерці дагэтуль невядомыя. Паводле сведкаў, праблемы з псіхалагічным станам вязняў, доўгія тэрміны, ШІЗА, пагрозы і прыніжэнні ствараюць у калоніі вельмі цяжкія ўмовы.

Агулам колькасць палітвязняў, загінулых у беларускіх турмах з-за нялюдскіх умоваў утрымання, сягая на сённяшні дзень 9 чалавек.

Вясна