Мы недаацэньваем, наколькі выпадковым ёсць статыстычны аналіз. Ён падобны на латарэю, дзе дробныя змены ў метадалогіі прыводзяць да прынцыповых зменаў у высновах.

Я калісьці спрабаваў праілюстраваць гэта жартам пра аўтаматычны генератар навуковых артыкулаў. Абіраеш патрэбную выснову паўзунком, а пад яе генеруецца тэкст: даныя, статыстычная мадэль, тэарэтычныя аргументы, спіс літаратуры. Даныя рэальныя, метадалогія цалкам легальная, спіс літаратуры - агульнапрыняты. Ніякага падману.

За аснову я ўзяў даследаванні пра дэмакратыю і эканамічны рост. Простым пераборам скамбінаваў стандартныя метадалагічныя рашэнні і атрымаў 9.148 унікальных рэгрэсій. У гэтым генератары кожны знойдзе нешта для душы. Хочаш, згенеруе паперу, як дэмакратыя абвальвае эканомікі ў 90-ыя, да радасці Кірыла Рудага і адэптаў аўтарытарнай мадэрнізацыі. Хочаш - дэмакратыя будзе прыводзіць да эканамічнага росквіту і шчаслівага канца гісторыі, як завяшчаў дзядуля Фукуяма.

Код для генерацыі папер таксама ідзе ў камплекце.