Bugun universitetda O‘zbekiston Respublikasi Vazirlar Mahkamasining 2017-yil 11-avgustdagi “Taʼlim muassasalarida chet tillarini oʻqitishning sifatini yanada takomillashtirish chora-tadbirlari toʻgʻrisida”gi 610-son qarori mazmun-mohiyati targ‘ibotiga bag‘ishlangan yig‘ilish bo‘lib o‘tdi.
Tadbirda mutaxassislik fanlarini chet tilida o‘tuvchi professor-o‘qituvchilar ishtirok etdilar.
Yig‘ilishda universitet o‘quv-uslubiy boshqarmasi boshlig‘i Sanjar Toshtemirov qarorda belgilangan vazifalar, chet tillarini o‘rganishning ahamiyati hamda pedagoglarning kasbiy salohiyatini oshirish masalalari haqida ma’lumot berdi.
Xususan, mutaxassislik fanlarini chet tilida o‘qitadigan, B2 va undan yuqori darajadagi malaka sertifikatiga ega pedagoglarning ish haqiga 100 foizgacha ustama belgilash nazarda tutilgani ta’kidlandi.
Korrupsiyaga qarshi kurashish “Komplayens-nazorat” tizimini boshqarish bo‘limi boshlig‘i Ulug‘bek Rajabov ta’lim jarayonida korrupsiyaning oldini olish, qonuniylik va shaffoflik tamoyillariga rioya etish yuzasidan fikr bildirdi.
Muloqot davomida pedagoglarning chet tilini bilish darajasini oshirish, tegishli malaka sertifikatlarini olish va ta’lim sifatini yuksaltirish masalalariga alohida e’tibor qaratildi.
Bizni birga kuzatib boring: 👇
🌐 Website | 📱 Facebook | 📱 Instagram | 📱 YouTube
QarDTU axborot xizmati ✍️