به شیعری "ئاگر گوڵ‌هیروو"ێ ؛ مامۆستا زاهر سارایی دەچینە پێشوازی ژمارە سێیەمی بیر و بیرمەند (پایزانه) کە تایبەتە بە #ئیلام.
هەم شەو سەرد سڕێگم، هەم خوەر گەرم گوڕێگم
م چەواشەێ عاڵەمم، خوەم هەم نیەزانم چ سڕێگم
جوور کەنگڵاشک ک پرچێ ها دەس هاژەێ شەماڵەو
بەن دە هۊ زریەێ نەۊە پەنجەێ دڵم؛ بێ‌باوڕێگم
جوور ئەرکوازی دە جەور زاڵنەێ زڵم حەسەن‌خان
دەێ شەوار بێ‌بەێانە شێویاگ خەوزڕێگم
نە دەنگ قیڕەێ قڵاێگە، نە دەنگ قاژەێ قوژێگە
دەێ قڵاقیڕان چووڵە، م بۊ ئەوخوەێ چڕێگم
چۊ بنەم دەم دەم یا، چۊ بخە‌م چنگ ئەو یەقەێ ئەۊ
م نە گورگ خۊن‌مژێگم، نە دەێِ دەم‌داێڕێگم
ڕا نیەوشکم سەونز و دێز و ڕا نیەخەم سا دە سەر ئاو
جوور نیلووفەر منیشە پەلوەچ پا دە قوڕێگم
هۊرِ دۊر ترنگە‌تانگێ دە بن هشکە گڵاڵێ
شەوق ئاسارەێ خەریوێ دە شەو سەرد سڕێگم
دی شەکەت بۊمە دە مەنتق، دە لەوەڕگاێ فیلسووفەێل
شێر وێشەێل جنوونم، خۊن‌فرووش شەڕخڕێگم
پووس م دە جنس دووسە، بێ‌ڕەنگ و بێ‌نام و نیشان
نەسفێدم نە سییەێگم، نە نووێگم نە شڕێگم
نیەێلم ئێ دێو شەوارە ئاو بکەێ دە کوانگ ڕووژ
ڕووژنای ئاسوو ڕووژئەڵدەر شەوئەڵدڕێگم
برشیامە دە خەم ئاوازِ کوشیاگِ قەناری
ئاگر گوڵ‌هیرووێ دە کوانگِ کێشتِ پڕێگم
تێومەو چۊ وەفر پایز، دوومە ئاو و چم وە چاڵاو
ئەڵکەنێ دەێ ماڵ ئمرە، هەر هەناسێ ئاجڕێگم
@khanehonarj1rood
Post #767
136
- ❤ 12