РЕПО операциялары мен деривативтер бойынша салық есептеудегі қиындықтар, халықаралық келісімдерді қолдану кезіндегі құқықтық белгісіздік және артық ұсталған салықты қайтарудың күрделі рәсімдері Қазақстандағы шетелдік инвесторлар үшін негізгі кедергілер болып отыр. Осы даулы мәселелерді талқылау және Қазақстанның капитал нарығында жұмыс істеуді барынша түсінікті әрі қауіпсіз ету мақсатында KASE "Қазақстан Республикасының бейрезидент заңды тұлғалары үшін KASE-дегі қаржы құралдарымен жасалған операцияларға салық салу аспектілері" тақырыбында сараптамалық семинар өткізді.

Қатысушылармен практикалық шешімдер мен нақты жағдайларды талдау нәтижесі бойынша BeOne Қазақстан компаниясының серіктесі және салық практикасының жетекшісі Меруерт Әмір, Б1 компаниялар тобының серіктесі және халықаралық бизнес бағытының жетекшісі Ирина Быховская, сондай-ақ Б1 компаниялар тобының қаржы секторы ұйымдарына салықтық қызмет көрсету тобының серіктесі Мария Егорова өз тәжірибелерін бөлісті.

Кездесу барысында сарапшылар акциялар мен борыштық бағалы қағаздарды сату кезінде құн өсіміне салық салу тәртібін, сондай-ақ төлем көзінен ұсталатын корпоративтік табыс салығынан (КТС) Қазақстан заңнамасында көзделген босатуды қолдану шарттарын егжей-тегжейлі талқылады.
Спикерлер РЕПО операциялары мен деривативтер бойынша салық базасын есептеудің ерекшеліктеріне ерекше назар аударды. Қолданыстағы заңнамада егжей-тегжейлі ережелердің болмауы кейбір жағдайларда салықты толық төлемеу немесе артық салық салу тәуекелін туындатады.

Қатысушылар қосарланған салық салуды болдырмау туралы келісімдерді қолданудағы практикалық қиындықтарды және кіріске нақты құқықты растау талаптарын орындауды, оның ішінде заңнамада "өтпелі" тәсіл деп аталатын тәсілді қолдану мүмкіндігін жеке талқылады.
Сонымен қатар семинарда артық төленген КТС-ны қайтару тәртібі мен үш жылдық мерзімі, бейрезиденттерді міндетті түрде салықтық есепке қою ережелері, олардың өзге де міндеттемелері және KASE-нің инвестициялық тартымдылығын арттыру үшін әкімшілік кедергілерді жою жөніндегі нақты ұсыныстар қарастырылды.