ائل‌دایاغی شهریار
▫️ایراندا "میللی شعر و ادبیات" گونو کیمی قئید اولان شهریور آیی‌نین ییرمی‌یئددی‌سی، بؤیوک آذربایجان، ایران و تورک دونیاسی شاعیری اولان و "شهریار" تخلص ائدن، محمدحسین بهجت تبریزی‌نین، همده اؤلوم ایل‌دؤنومودور. بو گونون بو مناسبتله آییرد ائدیلیب آدلانماسی، قارشی اولان بعضی اعتراضلارا باخمایاراق، اوُلو سؤز اوستادی شهریارین، تورک دیلینده اولدوغو کیمی، فارس ادبیاتیندا دا توتدوغو یوکسک یئرین گؤسترگه‌سی‌دیر.
آنجاق شهریارین ادبی یاشاییش و یارادیجیلغینی آراشدیرارکن، دقت چکن مقاملاردان بیری ده، اونونلا "بولود قاراچورلو (سهند)" آراسیندا اولان اؤزل و آنلاملی ارتباط و علاقه‌دیر. آنادیلی اولان "آذربایجان تورکجه‌سینی" و اونون "دده قورقود" کیمی اسکی نهنگ اثرلرینی، بوتون بوی‌لاری ایله درین‌دن اوخویوب، دوشونوب و ایکی جیلدلیک "سازمین سؤزو" اثرینده یئنی‌دن قاوراییب و منیمسه‌ین سهند، شهریارا دا تأثیر ائدرک، دوغما آذربایجاندان ایللرجه اوزاق دوشموش محمدحسینه، دوغما دیلیمیزین ده اینجه‌لیک و اینجی‌لرینی خاطیرلادیب، اونو "حیدر بابایا سلام" تکین، اؤلمز بیر منظومه‌نی قوشماسینا سؤوق ائتدی. شهریارین تورک دیلینده یازدیغی شعرلر "حیدر بابایا سلام" باشدا اولماقلا، چوخ سورعتله سینیرلاری سرحدلری آشیب، دیلداش و سویداش قونشو اؤلکه‌لره سس سالاراق، دونیا شؤهرتی قازاندی. و شوبهه‌سيز کی ایراندا دا، غرورو چئینه‌نیب، منلیگی تاپدالانمیش آذربایجان تورکلرینین اؤزگووه‌نین یوکسلتمکله یاناشی، اونلارین دوغما دیل و ادبیاتلارینا، داها چوخ دقت یئتیریب ییه‌لنمه‌لرینه سبب اولدو.
▫️سهندین شهریارا تأثیری
سهند "شهریارا مکتوب" آدلی شعری ایله، آچیقجا اونو اؤز کؤکلرینه قاییتماغا چاغیردی. بو اوزدن دئمک اولار کی بولودون شهریارا ان بؤیوک تأثیرلریندن بیری، اونون شعرلرینده تورک و آذربایجان کیملیی‌نین عکس ائتدیریلمه‌سی و جانلانماسی ایدی.
بو تأثیری بو یؤنلردن آراشدیرماق اولار:
– تورک دیلی‌نین ایشله‌دیلمه‌سی:
سهند شعرده تورک دیلیندن ایستیفاده‌یه وورغو ائدرک، شهریارا بو دیلین درین دویغو، حیس، آنلام و آنلاییش‌لاری ایفاده ائتمک قابیلیتینده اولدوغونو گؤستردی. شهریار دا سهنددن ایلهام آلاراق، تورک دیلینده شعرلر یازدی و بئله‌لیکله آذربایجان ادبیاتینا رنگ و زنگین‌لیک قاتدی.
– میللی وطن‌سئورلیک مؤوضولاری:
هر ایکی شاعیر، میللی و وطن‌سئورلیک مؤوضولارینا خصوصی دقت یئتیره‌رک، دیلداشلاری و هم‌یئرلیلری آراسیندا میللی حیس و دویغولاری گوجلندیرمه‌یه چالیشدیلار. سهند آذربایجان تاریخی و مدنیتینی وورغولایاراق، شهریارا دا اؤز یارادیجیلیغیندا، بو آنلاییش و قونولارا یئر وئرمه‌سی اوچون ایلهام وئردی.
– آیری-سئچکی‌لییه قارشیلیق:
سهند "یاساق" کیمی شعرلری ایله اؤنجه‌دن ده، آچیق شکیلده تورک دیلی و مدنیتینه اولان تبعیض، ایکیلیک و آیری-سئچکی‌لیکلری دیله گتیریب کاغیذا تؤکه‌رک، اونلارا اعتراضلار ائتمیشدیر. شهریار دا آرا-سیرا بو یولو ایزله‌یه‌رک، اؤز تورکجه شعرلرینده، بو تبعیض و آیری-سئچکی‌لیکلری موضوع ائده‌رک، آذربایجان ضیالی‌سیندا، قارشی گئدن بو دوروش و دیرنیشه، دستکلر وئرمیشدیر.
بونو دا آرتیرماق لازیم‌دیر کی شهریارین شعرلرینده آذربایجان کیملییی‌نین جانلانیشی و دیرچلیشی، اونون اؤزونه تأثیرلری یانیندا، آذربایجان ادبیات و مدنیتی اوچون ده، چوخ وئریملی و گؤز اوخشایان نتیجه‌لره سبب اولموشدور، او جومله‌دن:
– دیلیمیزین گوجله‌نمه‌سی:
شهریارین شعرلری، دوغما تورک دیلیمیزین درس اوخوموش ضیالی و هابئله گنج نسیل آراسیندا سئویلیب پوپولیارلاشماسینا دیرلی تؤحفه‌لر قازاندیرمیش‌دیر.
– کیملییی‌میزین دیرچه‌لیشی:
شهریارین شعری، آذربایجانلی‌لارین ایللر بویو تحقیر ائدیلیب تاپدالانمیش منلیک و کیملییی‌نین سیمگه‌سی کیمی اؤزونه یئر آچیب، قبول ائدیلمیشدیر.
– ادبیاتیمیزین اینکیشافی:
شهریارین تورکجه اثرلری، کیملیک و منلیگیمیزین یوکسه‌لیب جانلانماسیندا اولدوغو کیمی، ائوره‌نسل دیل و ادبیات هابئله اورتاق تورکجه‌میزین ده اینکیشافینا بؤیوک تکان وئرمیشدیر.
"اؤزگه چیراغینا یاغ اولماق بسدیر
دوغما ائللریمیز قارانلیقدادیر
یانیب، یاندیرمایاق یادین اوجاغینی،
ائویمیز سویوقدور، قیشدیر، شاختادیر..."
«شعر: سهند»
@ISA_Tabriz
@iran_sociology
Post #149
797
- ❤ 6