9-iyun kuni Sanoat kooperatsiyasi va davlat xaridlari agentligi hamda "El-yurt umidi" jamg‘armasi o‘rtasida hamkorlik memorandumi imzolandi.
Memorandum doirasida tomonlar kadrlar salohiyatini rivojlantirish, xalqaro tajribani o‘rganish, ilmiy-tadqiqot faoliyatini qo‘llab-quvvatlash hamda sanoat va ishlab chiqarish yo‘nalishlarida amaliy hamkorlikni kengaytirish bo‘yicha kelishuvga erishdi.
➡️Tadbir davomida Agentlik va Jamg‘arma rahbariyati o‘rtasida davra suhbati o‘tkazilib, hamkorlikning ustuvor yo‘nalishlari hamda kelgusidagi qo‘shma loyihalar muhokama qilindi.
Mazkur hamkorlik Agentlik, turli tarmoq korxonalari hamda sohaga oid tashkilotlar mutaxassislari uchun xorijning yetakchi universitetlari, ilmiy markazlari va sanoat korxonalarida ilg‘or tajribalarni o‘rganish, malaka oshirish hamda xalqaro hamkorlik aloqalarini kengaytirish imkoniyatlarini yaratadi.
🎓 Shuningdek, "El-yurt umidi" jamg‘armasi orqali xorijda tahsil olayotgan yoshlarni yozgi ta’til davrida Agentlik tizimiga hamda turli tarmoq korxonalariga stajirovkalarga yo‘naltirish, bitiruvchilarning istiqbolli startap loyihalarini qo‘llab-quvvatlash va ularni moliyalashtirish imkoniyatlarini kengaytirish bo‘yicha ham hamkorlik qilinadi.
🟢 Bundan tashqari, mamlakatimizdagi ilmiy-tadqiqot tashkilotlarining xorijiy R&D markazlari bilan hamkorligini rivojlantirish, dolzarb yo‘nalishlarda qo‘shma tadqiqotlarni amalga oshirish hamda ilmiy ishlanmalarni amaliyotga joriy etish, yoshlar o'rtasida STEM fanlariga qiziqishni orttirish bo‘yicha tizimli ishlarni yo‘lga qo‘yish nazarda tutilgan.
🎤 Uchrashuv yakunida tomonlar belgilangan yo‘nalishlar bo‘yicha amaliy hamkorlikni izchil rivojlantirish va qo‘shma tashabbuslarni amalga oshirish yuzasidan kelishib oldilar.
🌍Veb-sayt 🔹Telegram 🔹Instagram 🔹Facebook 📹Youtube X 🔹Linkedin