#giyohvandlikka_qarshi_kurash

17 yoshli maktab o’quvchisi Rossiyadan 852 gr. gashishni qabul qilib olganda qo‘lga olindi!

Bojxona qo‘mitasining Kontrabandaga qarshi kurashish boshqarmasi tomonidan Davlat xavfsizlik xizmati va Ichki ishlar vazirligi tezkor tuzilmalari bilan hamkorlikda respublikamizga giyohvandlik vositalarining kontrabandasini olish va fosh etish yuzasidan “xalqaro nazorat ostida yetkazib berish” tezkor-qidiruv tadbiri o‘tkazildi.

Toshkent viloyati Chirchiq shahrida o‘tkazilgan tezkor tadbirda 2009-yilda tug‘ilgan, ya’ni voyaga yetmagan shaxs Rossiyadan yuborilgan jo‘natmani qabul qilib olganda qo‘lga olindi.

Jo‘natma xolislar ishtirokida ochib ko‘rilganida, uning ichidagi 4 dona konserva qutilariga 852,2 gr “gashish” giyohvandlik vositasi yashirilgani fosh bo‘ldi.

Tezkor tadbir davomida o‘smir yoshning yashash xonadoni ko‘zdan kechirilganda, bu yerda elektron tarozilar, narkotik moddalarni tarqatishga mo‘ljallangan “zip” paketchalari hamda izolentalari borligi aniqlanib ashyoviy dalil tariqasida olindi.

852,2 gr. “gashish” o‘rta hisobda 60 ming dozadan oshadi va ushbu hajmdagi narkotikning qora bozordagi qiymati salkam 600 ming Rossiya rublini tashkil qiladi.

Shu o‘rinda ota-onalardan farzandlariga nisbatan e’tiborni susaytirmasliklarini va ularni doimiy nazorat qilishlarini so‘rab qolamiz. Xususan, farzandlarining ijtimoiy tarmoqlar orqali kimlar bilan muloqot qilayotgani va bo‘sh vaqtini qanday o‘tkazayotganiga yanada jiddiy e’tibor qaratishga chaqiramiz.

Hozirda holatda yuzasidan Bojxona qo’mitasi tomonidan jinoyat ishi qo’zg’atildi.