Следчы камітэт пачаў спецыяльную вытворчасць у дачыненні да Кацярыны Ваданосавай

Беларускую спявачку, тэлевядучую і папулярызатарку гісторыі Кацярыну Ваданосаву абвінавачваюць у «рэабілітацыі нацызму» (ч. 3 арт. 130-1 КК) і «адмаўленні генацыду беларускага народа» (ч. 1 арт. 130-2 КК).

Нагадаем, што крымінальную справу супраць Ваданосавай Генеральная пракуратура распачала яшчэ ў сакавіку 2026 года. Падставай для пераследу стала відэалекцыя «Галоўны міф Другой сусветнай — забойства гаўляйтара Вільгельма Кубэ. Што не так?»

У Следчым камітэце тады заявілі, што Ваданосава нібыта «груба фальсіфікуе і скажае гістарычныя факты», маніпулюючы асобнымі эпізодамі беларускай гісторыі дзеля рэабілітацыі нацызму.

Гэта яшчэ адзін прыклад палітычна матываванага крымінальнага пераследу за погляды на гістарычныя падзеі, якія разыходзяцца з афіцыйным дзяржаўным наратывам.

Спецыяльная вытворчасць дазваляе весці крымінальную справу і разглядаць яе ў судзе без прысутнасці абвінавачанай.