Кӯшониён: боздид аз истифодаи самараноки замин дар хоҷагии деҳқонии “Бобои Ҷаҳонгир”
 
Дар доираи сафари корӣ ба ноҳияи Кӯшониён раиси вилояти Хатлон Давлаталӣ Саид аз раванди самаранок истифодабарии замин дар хоҷагии деҳқонии «Бобои Ҷаҳонгир» боздид намуданд. Хоҷагии деҳқонии «Бобои Ҷаҳонгир» дар деҳаи Чорсӯи ҷамоати деҳоти Навбаҳори ноҳияи Кӯшониён ҷойгир буда, аз соли 2014 инҷониб фаъолият менамояд.
 
Майдони умумии заминҳои хоҷагӣ 8,0 гектарро ташкил медиҳад. Аз ин масоҳат дар 2,0 гектар қулфинай, дар 1,0 гектар юнучқа ва дар 5,0 гектар пахта кишт карда шудааст. Зимни боздид раиси вилоят аз гармхонаи доимоамалкунандаи хоҷагӣ, ки дар майдони 2,0 гектар бо истифода аз технологияи кишти қулфинай зери плёнка фаъолият менамояд, боздид карданд.
 
Дар ҷараёни боздид таъкид гардид, ки истифодаи самараноки заминҳо, кишти маҳсулоти серҳосил ва ҷорӣ намудани усулҳои муосири кишоварзӣ барои зиёд намудани истеҳсолоти кишоварзӣ ва таъмини бозор бо маҳсулоти тару тоза аҳамияти муҳим дорад. Фаъолияти хоҷагии деҳқонии «Бобои Ҷаҳонгир» нишон медиҳад, ки истифодаи дурусту самараноки ҳар як қитъаи замин ва рушди кишти маҳсулоти гуногун метавонад ба зиёдшавии истеҳсолот ва таъмини бештари ниёзи бозор мусоидат намояд.

📱 Обуна шавед — Ҳамдастӣ
📱Ба Тик Токи мо обуна шавед