Дар ноҳияи Шамсиддин Шоҳин корхонаи коркарди шир ва биноҳои баландошёна сохта мешаванд

Дар доираи сафари корӣ ба ноҳияи Шамсиддин Шоҳин нахуствазири Ҷумҳурии Тоҷикистон Қоҳир Расулзода ва раиси вилояти Хатлон Давлаталӣ Саид дар маросими гузоштани санги асоси корхонаи коркарди шир ва биноҳои баландошёна иштирок намуданд. Корхонаи нави коркарди шир бо мақсади рушди соҳаи саноат, зиёд намудани ҳаҷми истеҳсоли маҳсулоти ширӣ ва фароҳам овардани ҷойҳои нави корӣ бунёд карда мешавад.

Тибқи лоиҳа, бинои корхонаи коркарди шир аз 2 ошёна иборат буда, корҳои сохтмонии он моҳи сентябри соли 2026 оғоз гардидаанд. Ба анҷом расонидани корҳои сохтмонӣ 1 августи соли 2028 дар назар аст. Бунёди чунин иншооти истеҳсолӣ дар ноҳия барои рушди иқтидори саноатӣ, коркарди ашёи хоми маҳаллӣ ва таъмини бозори дохилӣ бо маҳсулоти хушсифати ватанӣ заминаи мусоид фароҳам меорад.

Ҳамзамон, дар доираи корҳои созандагиву ободонӣ дар ноҳияи Шамсиддин Шоҳин бунёди биноҳои баландошёна низ пешбинӣ гардидааст. Ин иқдом ба рушди инфрасохтори маҳаллӣ, беҳтар намудани шароити зист ва ободонии симои ноҳия мусоидат хоҳад кард. Гузоштани санги асоси иншооти мазкур қадами муҳим дар самти рушди иқтисодиву иҷтимоии ноҳияи Шамсиддин Шоҳин ба ҳисоб рафта, татбиқи он барои фароҳам овардани ҷойҳои нави корӣ ва таҳкими имкониятҳои истеҳсолии ноҳия аҳамияти муҳим дорад.

📱 Обуна шавед — Ҳамдастӣ
📱Ба Тик Токи мо обуна шавед