Xiaomi смартфонлари ва компания ҳақида шахсий фикрим.

Айнан шу компания смартфонлари тўғрисидаги қатор мақолалардан сўнг, ҳар доимгидек ўз шахсий фикримни келтириб ўтаман, каналимиз доимий ўқувчилари Samsung компанияси ҳақида ёзганларимни хам эслашса керак.

Xiaomi етарлича ёш компания бўлиб, 2010 йилда асос солинган ва бугунги кунда смартфон ишлаб чиқаришда дунёда олтинчи ва Хитойда тўртинчи ўринни эгаллаган.

"Хитойча Apple" деб Xiaomi ни бекорга айтишмаган, сабаби компаниянинг биринчи махсулоти хам Apple iOS кўринишидаги Android смартфонлар (Samsung Galaxy, HTC) учун прошивкалар бўлган.

Бугунги кунда компания кўпчилигимизга маълум бўлган смартфонлар, фитнес-билагузуклар (браслет), наушниклар ишлаб чиқаришдан ташқари қуёшдан сақлайдиган кўзойнаклар, кепкалар, ёстиқлар, стаканлар, филтрлар, сумкалар ва соябон каби оддий маҳсулотларни хам ишлаб чиқаради.

Компания смартфонларининг машхур бўлишига асосий сабабларидан бир нечтаси: Дунёнинг энг катта "бозорлари" Хитой ва Ҳиндистон давлатларида сотилиши, махсулот нархларининг нисбатан арзонлиги ва фойдаланувчи учун керак бўладиган барча имкониятларни смартфонларида мужассамлаштирганлиги.

Смартфонлар арзонлигининг сабаблари:

- Xiaomi компанияси вице-президент ва директори ўзи тан олганидек "Компания смартфонларнинг аппарат қисмидан деярли хеч қанча фойда топмайди". Фойданинг асосий қисми смартфонларда реклама кўрсатиш хисобидан.

- Бошқа смартфон ишлаб чиқарувчилардек рекламага катта маблағ сарфланмайди. Асосий рекламани фойдаланувчиларнинг ўзи махсулотни овоза қилиши (сарафанное радио) орқали амалга оширишади. Бу реклама тури Xiaomi учун анча қўл келди ва Ўзбекистонда ҳам "Redmi, Mi аппаратлар зўр экан" деган овозалар билан бозорнинг анча қисмини эгаллай олди. Эътибор берган бўлсангиз, Ўзбекистонда ушбу компаниянинг расмий сотув ва сервис марказлари мавжуд эмас ва оммавий ахборот воситаларида ҳам реклама қилинмайди.

- Бошқа смарфтон ишлаб чиқарувчилари сингари ўз шахсий заводларида эмас, балким хамкор компания заводлари хизматларидан фойдаланиши. Бунинг салбий томони бир хил модел смартфонда хар хил сифатдаги экран ва бошқа эҳтиёт қисмлари билан жихозланишига сабаб бўлади.

- Компания ривожланиш даврида, бошқа номи чиққан смартфон ишлаб чиқарувчи махсулотларидан "нусха" олишни эплай олганлиги. "Хитойча Apple" лақабини эсланг.
Тўғриси биз фойдаланувчиларга нима фарқи бор, қайси компания нимани биринчи ўйлаб топганлигини ва ушбу ихтиро учун катта маблағ сарфлаганини. Барчаси рисоладагидек ишласа бўлдида?!

Юқорида келтириб ўтилган маълумотлардан Xiaomi смартфонларининг афзалликлари ва камчиликларини англаб олиш қийин эмас.

Камчиликлар рўйхатига смартфонлар моделларининг номланиши чалкашликни хам айтиб ўтиш лозим. Харид қилишда Mi Mix, Mi Max, POCOPHONE ва бошқа сериялар нимаси билан фарқи борлигини ўрганиб чиқмасангиз, адашиб хам кетишингиз турган гап.

Афзалликлар рўйхатига эса айнан шу компания сабабли бошқа смартфон ишлаб чиқарувчилар хам нархларни анча туширишгани, хамёнбоп ва турли хил махсулотларни тақдим қилаётганини қўшиб қўйишимиз мумкин.
#Xiaomi #Redmi #MI