«Энергетика соҳасида энди хато қилишга ҳаққимиз йўқ» — Мирзиёев

Президент Шавкат Мирзиёев бугун ёқилғи-энергетика соҳасидаги инвесторлар билан ўтказилаётган мулоқотда энергетика соҳасида эришилган ютуқлар билан бирга, ҳали ҳал этилмаган муаммолар ҳам кўплигини тан олди.

Шу сабабли давлат раҳбари инвесторлар билан барча масалаларни очиқ муҳокама қилиб олишга қарор қилганини маълум қилди.

«Бугун биронта муаммо қолмаслиги керак. Ҳамма масалани ҳал қилишимиз зарур. Ютуғимиз бор, лекин камчилигимиз ҳам жуда кўп. Шунинг учун энди хато қилишга ҳаққимиз йўқ», — деган президент.

Мирзиёев энергетикадаги электр ишлаб чиқариш қувватлари ва уни истеъмолчиларга етказиб бериш тармоқлари ўртасидаги номутаносиблик соҳадаги муҳим муаммолардан бири эканига эътибор қаратган. Бунга мисол тариқасида эса Фарғона, Андижон ва Наманганда электрга бўлган талабнинг бир қисми бошқа ҳудудлар ҳисобидан қопланиб келинаётганини айтган.

«Агар янги саноат корхоналари ишга тушиши билан тармоқларга юклама янада ортади. 2030 йилгача 5 минг километр электр тармоғи ва 16 та йирик подстанция қуриш, энергия сақлаш қувватларини 4,5 гигаваттга етказиш режалаштирилган», — деган Мирзиёев.

Ана шундай режалар орасида — Ўзбекистон электр энергиясини Европа бозорига чиқариш ҳам борлиги қайд этилди.

Бунинг учун Озарбайжон ва Қозоғистон билан Каспий денгизи орқали «яшил» энергияни Европага етказиб бериш лойиҳаси муҳокама қилинган ва музокаралар амалий босқичга ўтган. Афғонистон ва Жанубий Осиё ҳам келгусидаги истиқболли экспорт йўналишлари сифатида кўрилмоқда.

«Биз бир-биримиз билан дўст бўлишимиз учун ҳамма нарса очиқ бўлиши керак, аён бўлиши керак, шаффоф бўлиши керак», — деди давлат раҳбари.

👉Каналга уланиш👈