Жәбірленушілердің мемлекеттік өтемақы алуы
 
Қазақстан Республикасында неғұрлым ауыр құқық бұзушылықтардан зардап шеккен азаматтарға бастапқы мемлекеттік қаржылық қолдау көрсетуге бағытталған «Жәбірленушілерге өтемақы қоры туралы» Заң (бұдан әрі - Заң) қолданылады.

Бұл төлем мемлекет тарапынан көрсетілетін материалдық көмек болып табылады және кінәлі адамның анықталғанына, оның жауаптылыққа тартылғанына және залалды өтегеніне қарамастан төленеді.

Заңнамада ақшалай қаражатты алуға құқығы бар азаматтардың санаттары: жыныстық зорлық-зомбылықтың құрбаны болған кәмелетке толмағандар, адам саудасының және азаптаудың құрбандары; кылмыс нәтижесінде денсаулығына ауыр зиян келтірілген немесе АИТВ/ЖИТС жұқтырған адамдар; сондай-ақ жәбірленуші қайтыс болған жағдайда оның заңды өкілдері (жақын туыстары) (баптардың тізбесі Заңда көрсетілген).

Төлем біржолғы болып табылады, ал оның мөлшері айлық есептік көрсеткіш (АЕК) негізінде есептеледі және қылмыс санатына байланысты 30 АЕК-дан 50 АЕК-ға дейінгі мөлшерді құрайды.

Жәбірленуші адам оны жәбірленуші деп таныған күннен бастап үш жыл ішінде өтініш бере алады.

Қылмыстық қудалау органы адамды жәбірленуші деп тану туралы қаулы шығарған кезде оған Қордан өтемақы алу құқығын және өтініш білдіру тәртібін жазбаша түрде түсіндіруге міндетті.

Банктік шот көрсетілген өтінішті істі жүргізуші тергеушіге (анықтаушыға) беруге болады. Қазынашылық процестік құжаттар пакеті қалыптастырылғаннан кейін төлемді қолма-қол ақшасыз тәртіпте жүзеге асырады.

Бұл қаржылық көмекті алу азаматты сот тәртібімен кінәлі адамнан материалдық және моральдық зиянды толық өтеуді талап ету құқығынан айырмайды.

Толығырақ түсініктеме алу үшін азаматтар қылмыстық іс жүргізіліп жатқан жердегі құқық қорғау органдарына хабарласа алады.

🌐 https://t.me/GenPr

Facebook | Instagram | YouTube | Сайт ГП