የባሕር በር ጉዳይ የሁሉም ፓርቲዎች የጋራ አቋም ሊሆን ይገባል
+++++++++++++++++++

#ጋዜጣ_ፕላስ | የባሕር በር ጉዳይ የፖለቲካ ፓርቲዎች ልዩነት የማያሳዩበት ሀገራዊ አጀንዳ መሆኑን የአዲስ አበባ ከተማ የፖለቲካ ፓርቲዎች የጋራ ምክር ቤት ሥራ አስፈፃሚ ወይዘሮ አዲስ መሀመድ ገለጹ።

ሥራ አስፈጻሚዋ ለአዲስ ዘመን ጋዜጣ እንደገለጹት፤ ወደብና የባሕር በር ያላትን ሀገር የመረከብ ፍላጎት በሁሉም የፖለቲካ ፓርቲዎች አቋምና የጋራ አጀንዳ ነው፡፡

በአዲስ አበባ የፖለቲካ ፓርቲዎች የጋራ ምክር ቤት ውስጥ የሚገኙ ልዩ ልዩ ፓርቲዎች በጉዳዩ ላይ ተመሳሳይ አቋም እንዳላቸው ጠቁመው፤ የባሕር በር ጉዳይ በፖለቲካ አቋም ምክንያት ልዩነት የማይታይበትና የሁሉም ፓርቲዎች የጋራ አቋም ሊሆን የሚገባው ቀዳሚ ሀገራዊ ጥቅም ነው ብለዋል።

ኢትዮጵያ የባሕር በሯን ያጣችበት የታሪክ አጋጣሚ በሕግ ሚዛን ሊታይ እንደሚገባ የገለጹት ወይዘሮ አዲስ፤ የባሕር በሮች ፍትሐዊ ተጠቃሚነት በዓለም አቀፍ ፍርድ ቤቶችና ስምምነቶች ሊመረመሩ የሚችሉበት አግባብ መኖሩን ጠቁመዋል።

ኢትዮጵያ ያላትን ታሪካዊ መነሻ፣ ማስረጃና የባሕር በሩን ስትጠቀምበት የነበረበትን አግባብ በአግባቡ ካቀረበች፣ በማንኛውም ዓለም አቀፍ የክርክር መድረክ የማሸነፍ ዕድሏ ሰፊ እንደሆነ አመልክተዋል፡፡

መንግሥት አሁን የጀመራቸውን የዲፕሎማሲ አማራጮች አጠናክሮ እንዲቀጥልና በታሪካዊ መብቶች ላይ ትኩረት አድርጎ እንዲሠራም መክረዋል።

የፖለቲካ ፓርቲዎች አርስ በእርስ ጣት ከመቀሳሰር ወጥተው ሀገራዊ ጥቅሞች ዙሪያ መመካከራቸው ለዲሞክራሲ ሥርዓት ግንባታውም ሆነ ለብሔራዊ መግባባት ትልቅ መሠረት እንደሚጥል አስረድተዋል፡፡

በሳሙኤል ወንደሰን