🪑
اوزرینده راضیلاشیلان گوج و اراده
اوزرینده راضیلاشدیریلان گوج و اراده چوخ زامان عمومی توپلومون ایسته‌دییی گوج و اراده اولور. بو، هر نه قدر ایده‌آل اراده اولماسا دا، ایشلک و قبول ائدیله بیلن بیر اراده‌نی فورمالاشدیریر. بو دا، عموم‌بشری اراده اوچون یئترلی‌دیر.
اوزرینده راضیلاشدیریلمایان گوج و اراده ایسه تَکیل (انحصارچی) بیر اراده‌دیر. بئله بیر اراده‌نین داوامی، گئج-تئز عموم‌بشری اراده‌نین زیانینا سبب اولاجاقدیر.
بورادا بیرینجی گوج و اراده‌نین اساس خصوصیتی اونون پایلاشیلماسی و یاییلماسی‌دیر. بو گوج و اراده، معین بیر دوشونجه و اراده‌یه تک دایانمادان، مختلیف باخیشلار و اراده‌لر اساسیندا یاییلیر. ایکینجی گوج ایسه معین بیر مرکزده جمع‌لنمیش و یئکونلاشمیش اراده‌یه اساسلانیر. بو گونون دیلی ایله دئسک: بیرینجیسینه #دئموکراتییا، ایکینجیسینه ایسه #دیکتاتورا دئمک اولار.
بیرینجی (دئموکراتیک) اراده‌نی پوزا بیلن هر کس یالنیز اؤزو اوچون تهلوکه یارادار. بو حالدا راضیلاشدیریلمیش گوج، یعنی دئموکراتیک نظامی پوزماق اولمور؛ سیستئم اساسلارینی ایتیرمه‌دن یاشاییر و دییشیک‌لیک یالنیز بیر اراده‌دن دیگرینه کئچیدله مومکون اولور. یعنی دئموکراتیک سیستئمین اؤزو یئرینده قالیر، یالنیز ایچینده‌کی واسطه‌لر –مثلاً، پرئزیدئنت– دَییشیر. سیستئم بو دَییشیک‌لیکلرله یاشاماغا داوام ائدیر.
ایکینجی (دیکتاتور) اراده‌نی پوزا بیلن کیمسه ایسه، یالنیز اؤزونو دئییل، هم ده قوردوغو سیستئمی و حاکمیتی تامامیله آرادان قالدیرمیش اولور. اگر بو رئژیم ظالیم و مشروعیت‌سیز و غیرلئگال بیر سیستئمدیرسه، اونون دئوریلمه‌سی یالنیز لیدئرلرله دئییل، هم ده بوتون قورولوشلاری ایله بیرلیکده حیاتا کئچیریلیر. مثلاً، پهلوی رئژیمی ایران انقلابی نتیجه‌سینده تکجه رهبرلری دئییل، بوتؤولوکده سیستئمین اؤزونو ده دَییشدی. اونو دستکله‌ین بوتون طبقه‌لر و قوروملار آرادان قالدیریلدی.
حال‌بوکی دئموکراتیک سیستئمده رئژیم دَییشمیر. حتتا بئله دئمک ده اولار کی، بو سیستئمده ثابیت بیر رئژیم یوخدور. یالنیز اونون آلَت‌لری –مثلاً، پرئزیدئنت– دَییشیر، آنجاق اساس پرینسیپلر یئرینده قالیر. بو کیمی سیستئملر یالنیز اراده‌لر آراسیندا پایلاشیم و تارازلیق اولدوقدا توتالیتاریزمدن یاخا قورتارا بیلر.
دئموکراتییا، اقتدارین اوزون مدت حاکمیتده قالماسی‌نین علیهینه‌دیر. دئموکراتیک دوشونجه‌ده اولان سیستئملر، اوزون‌مدتلی حاکمیتین عؤمرونو قیسالتماق آنلامیندادیر. بو جور سیستئم، حاکمیتده اولان بیر رهبرین حاکمیتده قالماسی اوچون زامان تعیین ائدیر. فیلان پرئزیدئنتین دؤرد ایل، بئش ایل، اون ایل حاکم اولماق زامانی وار. او زامان بیتندن سونرا بلکه ده بیر باشقا «اون ایل»ده اولدو. آنجاق اوندان داها آرتیغینا اجازه وئریلمیر.
بئله‌لیکله، دئموکراتیک سیستئم آز مدت حاکمیتده اولماغی اؤیره‌ده‌رک اؤزونو نظاملاما آپاریر. استبدادی اقتدار ایسه بونون عکسینه‌دیر. بو سیستئم، حاکمیتده اوزون مدت قالماغین یوللارینی تاپاراق اونو اؤز ایسته‌دییی چرچیوه‌یه سالیر. بئله بیر حاکمیت، چوخ زامان اؤز گوجونو وطنداشلاردان یوخ، خارجی، بلکه ده مئتافیزیک بیر قووه‌دن گلدیینی آنلاییر. بو گوج بیر سیرا حاللاردا «تانری»لار طرفیندن اونلارا وئریلدییی دئییلیردی. بو، عمومیتله آوروپانین رئنئسانسیندان اؤنجه‌یه عایددیر. شرق اؤلکه‌لرینین بیر چوخوندا بو دوشونجه هله ده قووه‌ده‌دیر. بئله‌لیکله، اونلار صاحب اولدوقلاری گوجو اؤز خالقلاریندان بیلمیردیلر، بونا گؤره ده حکومت ائتدیکلری ملت‌لری کؤله و رعیت حساب ائدیردیلر.
همت شهبازی
موغان- 1404.5.6
🗣️
https://t.me/dusharge1
Post #90
262
- ❤ 4
- 👍 3