🦜
اؤزون عشق آتشینه وورماغا دلشاد پروانه،
بلی، بیر دفعه یانماقدان اولور آزاد پروانه.
گؤرور مجلیسلر ایچره شمعی هر شب یار، اغیاره،
اونونچون یانماغین طرحین قیلیر بنیاد پروانه.
سنه، ائی شمع، تهمت‌لر قیلیر معشوقلر ایچره،
اگرچی خرمن عؤمرون قیلیر برباد پروانه.
دئمه معشوقه بی‌پروادی، شمعه کیم ملامتدن
وئریب جان صبحه‌دک اولدو وفادن شاد پروانه.
بیلیب شمعین وفاسین جیسم و جانین آتشه یاخدی.
غم هیجران دم وصلتده ائتدی یاد پروانه.
جفای هیجریدن جانه یئتیب شؤوق وصال ایله،
یانیب شمعین اودونا ائتمه‌دی فریاد پروانه.
یانار چون «ناتوان» خسته، مدام اول آتش غمدن،
صبور اول، ائیله عادت شیوه اوستاد، پروانه!

(دیوان خورشیدبانو ناتوان،
حسین فیض‌الهی وحید،
تبریز 1370: ص ۷۴)
🐫🐫
https://t.me/dusharge1
☘️