🔰
"اکینچی": ایلک آنا دیللی قزئت
(ملی مطبوعات گونو)


آذربایجان ملی مطبوعات گونو مناسبتی ایله قئید ائده‌ک کی، «اکینچی» قزئتی بیزی بو گونکو ملی شعورا آپاران ان اؤنملی باشلانغیجلاردان بیری ایدی. ۵۶ سایی چاپ اولونان بو قزئت، دورمادان ملتده ملی شعور یاراتماغا، ترقی‌یه و مدنی انکیشاف یوللارینی اؤیره‌دیردی. ائله بونا گؤره ده چار رئژیمی قزئتین فعالیتینی باغلاماق قرارینا گلدی. «اکینچی» قزئتی‌نین ۵۶.جی (سئنتیابر ۱۸۷۷) ساییندا درج اولونان آشاغیداکی بایاتی، روسلار طرفیندن قزئتین باغلانماسینا سبب اولدو:

عزیزیم، قار قالاندی،
قار یاغدی، قار قالاندی.
قارغالار لاچین اولدو،
لاچینلار قارقالاندی.

آرتیق قزئت بؤیوک بیر آشیریمی کئچمیش، تانینماغا باشلامیشدی. اونون باغلانماسیندان درحال سونرا اونسی‌زاده قارداشلاری طرفیندن تورک دیلینده «ضیا» و «ضیای‌قافقازیه» قزئتلری نشر اولوندو. چوخ کئچمه‌دی کی، آنا دیلیمیزده چاپ اولونان قزئتلرین سایی یوکسک رقمه چاتدی.

۱۹۰۵–۱۹۱۷.جی ایللر آراسیندا قوزئی آذربایجاندا ۶۶ قزئتدن ۶۳ قزئت تورک دیلینده چاپ اولونوردو. بو دؤور، ژورنالیستیکانین ان فعال مرحله‌سی کیمی دیرلندیریلیر.

گونئی آذربایجانین بو گونکو اهالیسینی نظره آلاراق، تورک دیلینده یازان تئلئگرام، انستاگرام و سایتلارداکی فعالیتله، قوزئی آذربایجانین همین دؤورده‌کی اهالیسی و یاییملانان قزئتلرینی مقایسه ائتدیکده، گونئی آذربایجاندا تورکجه نشریات و بو دیلده یازیلان یازیلارین دئمک اولار کی، صیفیر سوییه‌سینده اولدوغونو گؤروروک. محض بونا گؤره ده او زامانکی آیدینلارین چاباسی نتیجه‌سینده ملی شعور اویانماغا باشلادی. نتیجه‌سی ایسه بو گون موجود اولان مستقل بیر اؤلکه‌دیر. بیز ایسه هله ده همین ملی شعورو قازانا بیلمه‌میشیک. عکسینه، اؤز کیملییمیزی یاد کیملیکلرله اوز ائتمه‌یه جانلا-باشلا تله‌سیریک. گوندن‌گونه بایاغی دوشونجه‌لره قاپیلاراق، باشقالارینین اویونجاغینا چئوریلیب ملی پارچالانمایا دوغرو سوروکله‌نیریک.

✍️ همت شهبازی

۲۲ ایول/ ۳۱ تیر ملی مطبوعات گونو

https://t.me/dusharge1
☘️