☘️
بؤیورتکن‌لیکلر سیراسیندان-۱
شعر: #همت_شهبازی

بؤیورتکن‌لیین خالخالی ایپه‌یینده
گاه قیزاریر،
گاه قارالیر
سئوگیلیمین ماوی‌لییی.
هردن حاجی‌لئیلک‌لر قانادلانیر
آرازین چیسگین‌لی بَنیزیندن.
قانادلاریندا دورنالارین انتظارینی
حاخلاییر کؤکسومون آجی خطرینه.
هاوانین کؤپویونده
آرازی او تای بو تای آددیملاییرام
بورکولو قوخوسوندا
چیینیمه پَرچیمله‌نن ساعاتلاری فیرلاییرام
آخ نه قدر یالقیز
نه قدر درین‌لشیرم
آراز سویونون فیریلقان هیزینده
یولغونلوقلارین ایلغیملی یارپاقلاری
دویغولاریمی بؤلور
آغاریب بوزاران ساچاقلاریندا.
یولغونلوقلارین دیبینده
گیزلینجه سئویشن ایکی سئوگیلی‌نین آیاق ایزلری
بؤیورتکن‌لیک‌لرین یارپاقلاریندا
ایکی سئوگیلی‌نین اؤپوش قوخوسو
بیر قوش دَنله‌دی
بؤیورتکن‌لرین یوموشاق بَنیزینی.
اوچدو،
اوچدو
آرازی آشدی
و قوندو یئنه ده تانیش بؤیورتکن‌ تارلاسینا.

موغان - ۱۳۷۷


📚#بولودقونورگؤزلرینه کیتابیمدان
🐫🐫
https://telegram.me/dusharge1