🦜🦜
📌 ایران رئژیسورو جعفر پناهی‌نین «کن فیلم فئستیوالؽندا» آلدؽغی اؤدولدن سونراکی دئموکراسی حاققؽندا بزکلی دانؽشیغی "سئرچه‌نی بۆلبول یئرینه بزه‌مه‌یه" بنزه‌ییردی.
ایران ضیالؽلاری دئموکراسینی پهلوی رئژیمی تفکۆرو قالؽقلاری اساسؽندا اوْلان "ایران بیرلییی =ایران اراضی بۆتوولویو" ایله معنالاندؽریرلار.
جعفر پناهی‌نین فئستیوال دانؽشیغی‌نین بایاغؽ‌لیغی، اونون دۆشونجه بایاغؽ‌لیغیندان ایره‌لی گلیر. دانؽشیغیندا آنلایؽشجا بیر-بیرینه ضید اولان ایکی اؤنملی جۆمله‌سی وار ایدی:
"آزادلؽق، انسانلؽق و دئموکراسی حؤرمتی نامینه اؤلکه داخیلی و خارجی فیکیر و ایناملارؽندان آسؽلی اولمایاراق بۆتون ایرانلؽلاردان ریجام بودور کی اختلافلارؽ قؽراغا قویسونلار. اؤنملی اولان اؤلکه‌میز و اونون بیرلییی‌دیر".بو سؤزدن بئله چؽخیرکی گویا ایران اؤلکه‌سی بوگون-صاباح چؤکه‌جکدیر. ایلک جۆمله‌ده دئموْکراسی ایسته‌ین ضیالؽ درحال سونراکی جۆمله‌ده دئموکراسیدن اولان آنلایؽشینی آچؽقلاییر. اونون ایرانا عاید دئموکراسیدن اولان یوزومو، ایران بیرلیینده خلاصه اولور. دئموْکراسی آدؽ آلتؽندا انسانلارا آزادلؽق ایسته‌ییندن درحال سوْنراکی جۆمله‌سیندن اؤلکه داخیلینده اوْلان غیر-فارس میلتلرین حاقلارؽنی تاپدالایؽر. غیرمعین (مبهم) اولان بو ایفاده باشقا خارجی اؤلکه‌لره تانؽش اولماسا دا ایران داخیلینده اولان غیر-فارس میلتلره چوخ تانؽش بیر آنلایؽشدیر: بو ایفاده‌نین ایچیندن فارس دیلی، فارس اقتصادیاتؽ، فارس حاکمیتی اطرافؽندا بیرلشمه آنلایؽشینی چؽخارماق چوْخ دا چتین دئییل.
پناهی دئموکراتیک شعاری آدؽ ایله مطلقچی بیر دۆشونجه‌نین آرخاسؽندا دوردوغونو گؤستردی.
ایران ضیالؽلاری دۆنیا دۆشونجه‌سینه اؤنملی یئنی دۆنیاگوروشو آرتؽرا بیلمه‌دییی حالدا شابلوْنلاشمیش (کلیشه‌ای)، چیینه-تۆپور اوْلموش، حتتا اؤزلرینه ده معناسؽ نامعلوم اولان بیر سؽرا آنلایؽشلارلا دویغوسال میلتین کؤنلونو قازانماق ایسته‌ییرلر. هر زامان ایران داخیلینده اولان میلتلر کیچیک حاقلارؽ اۆزرینده مبارزه‌یه کئچمیشلر، او زامان اونلارین "ایران داغؽلدی" اۇیدورماسینا کؤکله‌نن دۆشونجه‌لری بیر چیبان کیمی شیشیر. اؤلکه داخیلینده اولمایان بو اۇیدورمانی قاباردان جعفر پناهی آنلایؽشجا ایکی ضیدیتلی جۆمله ایله ایکی دۆنیانین کؤنلونو آلماق ایسته‌ییر:
۱. دئموکراسینی دستکله‌مه‌سی ایله غرب دۆنیاسینی
۲. ایران بیرلییی ایفاده‌سی ایله ایران داخیلینده هر زامان قاراباسما ایله یاشایان شوْوینیستی دۆشونجه‌نی.
✍️ همت شهبازی
🐪🐪
https://telegram.me/dusharge1