داستایوفسکی‌نین جینایت و جزا رومانی

یازان: #محمدعاریف
اختصارلا کؤچورن: #همت‌شهبازی

"جینایت و جزا" اوخوجولارین دیققتینی درحال جلب ائتمیش و یازیچی‌نین شهرتینی آرتیرمیشدی. بونا سبب اثرین احاطه ائتدییی اجتماعی-فلسفی مسئله‌لرین اؤنملی و چاغداش اولماسی ایدی. البتده بورادا صحبت «مقصده اویغون» وجدانین اشتراکی، عقلین مصلحتی ایله ائدیلن حرکتدن، جینایتدن گئدیردی. رومانین باش قهرمانی #راسکولنیکوف یوخسول بیر اؤیرنجی‌دیر، عالی مکتبدن قوولموشدور. اوخوماغا و یاشاماغا مادی امکانی اولمایان بو اؤیرنجی اوسته‌لیک آناسینی و باجی‌لارینی دا ساخلامالی‌دیر. یوخسوللوق و آجلیق راسکولنیکوفو غریبه فیکیرلره گتیریب چیخاریر. او، حددیندن آرتیق پولو اولان و بو پولدان یارارلانمایان قوجا قارینی اؤلدوروب، پوللارینا یئیه‌لنمک و راحات یاشاماق فیکرینه گلیر. او فیکیرلَشیرکی، هئچ بیر شئیه یارامایان وئجسیز بیر قارینی اؤلدورمک جینایت دئییل‌دیر، آخی، بو قاری بو گون یا صاباح اؤزو اؤله‌جک، آمما من اونو اؤلدورمکله، یاشامالی اولان بیر چوخ آدامی اؤلومدن قورتارارام، بو داها یاخشی دئییل‌می؟ راسکولنیکوف بو حرکتی ایله توپلومداکی عدالت‌سیزلییی آرادان قالدیرماق، چکدییی اذیت‌لرین عوضینی چیخماق، حیاتدا بیر سوییه‌لیک یاراتماق ایسته‌ییر. او اؤز پلانینی یئرینه یئتیریر، قارینی اؤلدوروب، پوللارینا یئیه‌لَنیر. ایندی عؤمرونون سونونادک راحات یاشایا بیلر. آنجاق ائله اولمور. وجدان عذابی اونو راحات بوراخمیر، او حیس ائدیرکی، ایشلتدییی جینایت اونو آداملاردان، خالق‌دان اوزاقلاشدیرمیشدیر، بوجور یاشاماق چتیندیر.
راسکولنیکوف مارمئلادوفلار عایله‌سیله تانیش اولور. بورادا داستایوفسکی باشقا دهشتلی بیر عالمی قارشیمیزدا ایشیقلاندیریر. یوخسوللوغون، دیلنچی‌لیین و سرخوشلوغون تؤرتدییی سفیل یاشاییش واراقلاری بیر-بیرینی عوض ائدیر. یازیچی واختی ایله گئنیش یاییلمیش فاحشه‌لیین اجتماعی کؤک‌لرینی آچیب گؤستریر ...

مارمئلادوفون دفن مراسیمینده یئنی بیر فاجیعه آرایا چیخیر: زاواللی سونیانی اوغورلوقدا سوچلاندیریب روسوای ائتمک ایسته‌ییرلر. راسکولنیکوف اونو مدافعه ائدیر. بو قیزین فاجیعه‌سی فونوندا راسکولنیکوفون جینایتکار نظریه‌سی چوخ ائتکیلی سس‌لنیر. کئچیردییی فاجعه‌لره، سفالته و یوخسوللوغا باخمایاراق سونیا مارمئلادووا اوره‌یینی تمیز ساخلایا بیلمیشدیر. اوندا چوخ خئیرخواه و فداکار بیر قلب واردیر. او، محبت یولوندا بوتون وارلیغینی قوربان وئرمه‌یه حاضیردیر. سونیانین بو ایلاهی سیماسی راسکولنیکوفو مفتون ائدیر. بو یوخسول، جانی اؤیرنجی اؤز لووغالیغیندان اوتانیر، انسان قلبی‌نین نجابتینه، معنوی قدرتینه، مردانه محبتینه تسلیم اولور. او اؤز جینایتی‌نین جزاسینی سونیانین پاک محبتی ایله، علوی معنویاتی ایله یویور. سورگونده، بدبخت محبوسلار آراسیندا راسکولنیکوف سانکی یئنیدن دونیایا گلیر.
راسکولنیکوفون «عصیانینی» داستایوفسکی تقدیر ائتمیر. بو مغرور، فردیت‌چی، خودپرست (ائقوئیست) انسان خام خیالا دوشور و یئنیلیر. او دا #پوشکین- ین #قاراچی‌لار (آلئکوسو) کیمی شهرین بوغوجو هاواسیندان قاچیب آزاد قاراچی‌لارین یانینا گلَنده اورایا اؤزو ایله فردیت‌چیلیک، لووغالیق میکروبلارینی گتیریر، آزادلیغی آنجاق اؤزو اوچون ایسته‌ییر، اؤزو اؤز نظریه‌سی‌نین علیهینه گئدیر و قاراچی‌لار طرفیندن قوولور. راسکولنیکوفون دا دهشتلی پیغمبرلییی باش توتمور، یئنیلیر. #داستایوفسکی‌نین «جینایت و جزا» رومانی معین درجه‌ده جدلی [پولئمیک] کاراکتئر داشییردی. راسکولنیکوفون سیماسیندا ادیب چئرنیشئفسکی‌نین «نه ائتمه‌لی؟» رومانیندا قویولان پروبلئمی پیسله‌ییردی، راسکولنیکوفو #نیهیلیست کیمی قلمه وئریردی. 1860.جی ایللرده، اؤزللیکله #تورگئنیف-ین «آتالار و اوغول‌لار» ( 1862 ) رومانیندان سونرا، بازاروف کاراکتئری ایله علاقه‌دار اولاراق #نیهیلیزم اوصولونو، اونون یاراتدیغی سیاسی، اجتماعی و مدنی نائلیت‌لری تامام دانان بیر جریان کیمی مئیدانا چیخمیشدی. کؤهنه‌لیک طرفدارلاری چئرنیشئفسکی‌نین اؤز رومانیندا اساسلاندیردیغی انقلابچی #دئموکراتیزم فیکیرلرینی نیهیلیزم آدلاندیراراق پیس‌لمه‌یه باشلامیشدیلار. اجتماعی - فلسفی فیکیرلرینده دئموکراتیزم ایله ارتجاع آراسیندا شوبهه ائدن داستایوفسکی اؤز اثرلرینده نیهیلیزمین فاجعه‌سینی گؤسترمک و راسکولنیکوفو تنقید ائتمک ایسته‌میشدی. آنجاق بؤیوک صنعتکارین نیهیلیستی عذابکئش انسان‌دیر، او معنوی بحران کئچیریر، مغلوبیتی‌نین فاجعه‌سینی دریندن یاشاییر. #داستایوفسکی راسکولنیکوفون فاجعه‌سینی یالنیز شخصی فاجعه کیمی یوخ، تاریخی گئدیشاتین ضیددیت‌لری اوچون اضطراب چکن، کدَرله‌نن انسان‌پرور بیر انسانین فاجعه‌سی کیمی گؤسترمه‌یه چالیشمیش، اونون سهوینه و بو سهوی درک ائتمه‌سینه فلسفی معنا وئرمیشدیر.
#جینایت_و_جزا رومانی هر شئیدن اول اؤز کسکین رئالیزمی...

آردی وار 👇👇👇
@dusharge1
👇👇