تانینمیش آذربایجان تاریخچی‌لییی اوزرینده ایل‌لرجه قلم وورموش سایین محمد عزیزی راد آذربایجان مطبوعاتی حاققیندا چوخ گئنیش آراشدیرما آپارمیشدیر، بو تدقیقاتین اوچ جیلد "تاریخچه مطبوعات آذربایجان"اوچلویو اؤزلویونده اهمیتلی و دقیق معلوماتی اوخوجویا چاتدیردیغی اوچون تایسیز بیر چالیشما کیمی آدلاندیریلا بیلر، آراشدیرمادا مشروطه حرکاتینی ایکی یئره بؤلوشموش یازیچی، بیرینجی مشروطه و ایکینجی مشروطه‌دن سؤز آچار، بو مسأله اوخوجویا ایلکین اوخونوشوندا یاردیمچی اولور و اونون سونراکی تحلیل دونیاسینا عوض‌سیز مثبت تاثیر ائدیر، بیرینجی مشروطه، مۆظفرالدین شاهین اؤز ایراده و اختیاری اساسیندا مشروطه‌نی اعلان ائتمه‌سی‌دیر و اونون "تاریخ بیزه دؤزمه‌یه‌جک "سؤزویله ایصلاحاتین باشلانیلماسی‌دیر، بو دؤورون اساس اؤزللیک‌لریندن حاکیمیت طرفیندن مشروطه‌نین اعلان ائدیلمه‌سی قزئته‌چیلیک‌ده اؤز مثبت تاثیرینی ائدیر و کوتله اوچون آیدین‌لاشدیریلمیش رولونو ایفا ائدیر، بو دؤوردن گونش ایلی (۱۲۸۵ـ۱۲۸۸) کیمی آذربایجان شهرلرینده قزئته‌‌لرین یایقین‌لاشماسی اؤزوده آذربایجان تورکجه‌سینده چاپ اولونماسی هم مشروطه‌چی دسته‌لر هم آزلیق‌دا اولان ایستیبداد طرفدارلاری طرفیندن آذربایجان تورکجه‌سینین اهمیتلی تاریخی رولونو بیرداها ثوبوتا یئتیریر،نه یازیق آذربایجان تورکجه‌سینده چالیشان آدلار بو گون‌لر چئشیدلی سبب‌لر اوچون اونودولموشدور، آنجاق بیرینجی آددیم اوچون بیرینجی
مشروطه دؤورونون چاپ اولونموش قزئته‌لری،تبریز، اورمو، خوی و اردبیل شهرلرینده ایشیق اۆزو گؤرمه‌سی گؤزه چارپاندیر ، اون بئش قزئته فارسجا دیلینده، سکگیز قزئته ایسه ایکی دیللی اولاراق فارسجا و تورکجه و بئش قزئته او جومله‌دن آنا دیلی، آ موللا عمی، خئیراندیش، شکر و وطن دیلی آذربایجان تورکجه‌سینده ایشیق اوزو گؤرموشلر، آنجاق ایکینجی مشروطه حرکاتینا گلینجه(۱۲۸۸ـ۱۲۹۹) تکجه سکگیز قزئته ایکی دیللی و بیر قزئته "صؤحبت" آدیندا آذربایجان تورکجه‌سینده یاییملانمیشدیر، بو بیر حالدا دیر کی اون اوچ قزئته تام ائرمنی دیلینده چاپ اولونموشدو، آذربایجان ائرمنی خلیفه‌چی‌لرینه عایید قزئته‌لر، ائرمنی کندلرینه عایید قزئته‌لر و أن اؤنملی‌سی داشناقسیون دسته‌سینه عایید قزئته‌لردیر، ائله ایکینجی دسته‌نین هانسی یئره باغلی اولدوغودا اؤزلویونده تاسسوف دوغوران یئردیر،قاراداغ کیمی بؤیوک بؤلگه‌نین تکجه ائرمنی کندلری اوچون خبر پایلاشدیغی وضعیتین نئجه‌ده دهشتلی اولدوغونو گؤستریردی، بو وضعیت ایل‌لرجه اؤرت باسدیر ائدیلمیش ایکینجی مشروطه حرکاتی‌نین هانسی مقصدلره قاچینیلماز اولاراق تاثیر ائتدییینی بیز هله ایندی گؤروروک، بیرینجی مشروطه دؤورو اؤتری اولسادا دینج فضادا مدنییت و آذربایجان تورکجه‌سی اوچون چیچک‌لنمه دؤورونو یاشاتماغا باشلامیشدی، آنجاق ایکینجی مشروطه دؤورو بیر سؤزله قاجار محمدعلی‌شاهین چؤکوشو و اؤلکه‌نین تهلوکه‌سیزلیک باخیمیندان آغیر وضعه سالینماسی و چار روسییاسی وطنداشی ساییلان آنارشیست ائرمنی دسته‌لریندن اولان یئفرم خانین ایرانا گلمه‌سی و سونرالار پولیس ریاستینه سئچیلمه‌سی وضعیتین نئجه‌ده دهشتلی و فاجیعه‌لی اولدوغونو گؤسته‌ریردی،ائله بو دؤوردن باشلایاراق کودئتاچی‌لار دؤورونه کیمی داشناقسیون دسته‌لری گله‌جک ایستیبداد اوچون عوض‌سیز خیدمت‌لر ائتدیلر، تورک تاتار یازیچی‌سی موراد آدجی،" قیپچاق چؤلونون یووشانی" آدلی اثرینده یادداش‌سیرلیغی بیر خالق اوچون بؤیوک فاجیعه و دهشت کیمی آدلاندیردیر، ائله بو اوزدندیر اولا بیلسین ائرمنی دسته‌لری جناب عزیزی‌رادین توخوندوغو کیمی خالقین اونوتدوغو و اولا بیلسین گوجلو یئرلی ژورنالیستکانین اولمادیغی یئریندن گله‌جک منفی سییاست‌لریندن و مدنییت اوزره مرکزی دسته‌لره تاثیر ائتمه‌لریندن کنارا چکیلمه‌دیلر
@sadiqiyan1986
Post #254
194
Forwarded from یالقیز کؤچری (behzad. sadeghian.fard)
- ❤ 5
- 👍 1